Municipal pawnlamah pawh property tax khawn ve dawn

Municipal pawnlamah pawh
property tax khawn ve dawn
Municipal Corporation/ Council pawnlamah Mizoram sawrkar chuan property tax a khawn ve dawn a. Village council-te kutah a khawn hna dah a ni.
Aizawl Municipal Corporation leh Lunglei Municipal Council-in property tax a khawn zulzuiin Local Administration Department chuan khaw tinah ‘in sak man’ a khawn dawn a. Assam type – thing hmanga in sak, a bang tile, a chung rangva hmanna chi ah Rs.100; semi pucca – inchung rangva, rangva rawng nei inchung leh a bang atan brick emaw concrete block hmang, a ban concrete-ah Rs. 150; concrete building-ah Rs.200 khawn turin a ti.
A khawn hna hi village council kutah dah a ni a. VC-te hian receipt an pe anga, a bung lehlam kawl tha turin department chuan a ti. ‘Audit theih turin register siamin an chhinchhiah vek tur a ni a. Gram Sabha pawmpuina in, heng chhiah tlingkhawm hi khawtlang hmasawnna atan an hmang thin ang. Kumtin anmahni enkawltu DLAO ah an chhiah lakkhawm leh hman dan an report thin ang,’ a ti.
LAD hian VC-te thuneihna dan thar a siam, Mizoram (Village Councils) Act 2025 hmangin village council-te hnenah property tax khawn tura thuneihna hi a pe a. Khawtlang huap hnatlang koh tumin, hnatlang theilote phatna Rs. 250, runna Rs 500 thlenga chawi tir theihna a pe bawk.
Khua leh tuite thu leh hla buai a awmin, thubuai ziahluhna registration fee Rs.100 la thei turin VC-te hi a ti a.
VC-ten thu awihlo hremna atan Rs. 2000 thleng a tul anga an chawitirin an hrem thei dawn a ni.