MVA ten tangruala inthlan chuh tum

Maha Vikas Aghadi (MVA) te chuan an inlungrualna lantirin Maharashtra State Assembly inthlan awm mai turah tangruala chuh an tum thu an puang chiang ta.
“Lok Sabha inthlana Maha Vikas Aghadi chakna kha a tawpna a ni lo, a bultanna chauh a ni. Kan alliance chuan State Assembly inthlan lo awm tur pawh lungrualin kan hmachhawn ang” tiin Shiv Sena (UBT) leader leh Chief Minister hlui Uddhav Thackeray chuan a sawi.
Maharshtra state mipuite chuan BJP te hneh theih loha an inngaihna kawrawng zia an lantir tawh, tiin a sawi bawk a. MVA chu party tenau dangte pawh an la zawm zel thei tia sawiin zawm duh an awm chuan an ngaihtuah ang a ti bawk.
Nationalist Congress Party (SP) president Sharad Pawar leh Thackeray te chuan legislator anmahni chhuahsana rebel faction te zawm te chu an pawm danw tawh loh thu an sawi bawk a.
“Min chhuahsan tute tuna lo let leh duh te chu kan pawm tawh dawn lo” tiin Thackeray chuan a sawi bawk a. Thackeray bakah hian Nationalist Congress Party (SP) president Sharad Pawar leh Congress hotu Prithviraj Chavan te chuan MVA anga State Assembly inthlan an hmachhawn tur thu hi an puang a ni.
Lok Sabha inthlan chungchangah Thackeray chuan INDIA bloc te chuan Modi sorkar chu NDA sorkarah a dah hniam a ti bawk.
Sharad Pawar pawhin a nephew leh Maharashtra Deputy Chief Minister ni mek Ajit Pawar tan an party ah hmun a awm tawh lo a ti bawk.
Lok Sabha inthlana MVA te an chetthat em avangin Shive Sena leh NCP a rebel faction a aiawh leh leader te chuan an chhuahsan party a let leh duhin inbiakna an kalpui nasa a ni.
June 2022 kihan Shiv Sena leader Eknath Shinde chuan Thackeray lakah helin a chhuahsana BJP te nena tang dunin Mahayuti alliance siamin a Chief Miniser zui phah bawk. A kum leh lawkah Ajit Pawar chuan a uncle Pawar lakah helin Mahayuti alliance chu zawmin Deputy Chief Minister a ni zui bawk a ni.
Congress hruaitu Chavan chuan Lok Sabha inthlan result a chhuak tawh a ‘State ah sorkar thar a piang ngei dawn’ a ti bawk a. “Lok Sabha inthlana mipui ten min vote dan atang khan Assembly inthlanah pawh min thlawp dawn tih a chiang a ni. Chuvangin MVA angin inthurualin maharashtra inthlan kan hmachhawn dawn a ni” tiin a sawi.
Seat sharing chungchangah Chavan chu sawihona bultan a ni tawh a, Assembly seat milin thutlukna kan siam ang a ti bawk.
Lok Sabha inthlanah khan Maharashtra a seat 48 awmah MVA ten seat 30 an la a, rulin Mahayuti chuan seat 17 an la thung. Seat khat Sangli chu Congress rebel Vishal Patil an Independent a chuhin a tling a, a hnuah Congress party a thlawp thu a sawi zui thung.
Maharashtra Home Minister hlui leh NCP (SP) leader Anil Deshmukh chuan Ajit Pawar chu bawngpui hnute nei tawh lo nen a khaikhin a. “Bawngpui chu hnute a neih chhung chawmina awm a. Hnute a neih tawh loh chaun talh tura thawn mai thin a ni” a ti a, “Ajit Pawar hian BJP zawm dang ang bawkin a zawm hnuah a case neih tihtawp a ni a. BJP te hian Anna Hazare hmangin strategy an duang a. A hmasa berah Ajit pawar an neih hnuah a hming an tichhe zui ta a ni, hei hi BJP agenda kalpui dan a ni,” tiin a sawi.
April thla khan Ajit Pawar leh a nupui Senetra Pawar te bakah NCP(SP) MLA leh Shara Pawar a grandnephew Rohit Pawar te chu Maharashtra State Cooperative Bank (MSCB) scam case ah fihlim tirin an awm a. He case hi kum 2005 atanga 2010 inkar chunga co-operative sugar mills, factories leh yarn mills a loan hmanga sum tam tak pekchhuah a hnua non-performing asset a chhuak ta chungchang a ni a, Ajit Pawar chu MSCB director zinga pakhat a ni.
Tun hnai lawkah Mumbai Police a Economic Offences Wing ah report thehluh a ni a.
He mi chungchangah hian social activist Hazare leh Manikrao Jadhav te chuan report te chu court ah an khin tur thu an sawi zui bawk.