Myanmar-ah mi 3,400 thi tawh, ruahin hna thawh tibuai

Myanmar-ah mi 3,400 thi tawh, ruahin hna thawh tibuai
Lirnghingin na taka a sawi, Myanmar-ah chuan ruah tam tak a sur a, hei hian chhanchhuah leh chhawm dawl hna a tihbuai bakah natna a len phah hlauhthawnna a lian hle a. March 28 lirnghinga thi hi mi 3,471 an tling ta bawk.
A intanna bul lawk, a tuar na ber zinga mi, Mandalay khawpuia chhanchhuah hna thawktute chuan Pathianni khan a hma zanin ruah tam tak leh thli na tak a thawk a, an puan inte tichhiain dam chhuak awm mekte thil neih pawh a len nasa hle tih an sawi.
Ruah hi la sur chhunzawm tura ngaih a nih bakah khaw lum lampawh 37°C kai tura sawi lawk a ni bawk.
“Khaw awm dan hi uchuak tak a ni,” tiin United Nations Development Programme-a specialist Tun Tun chuan AFP news agency a hrilh.
Puitu pawl hrang hrang chuan a hun lova ruah sur leh khaw lum lutuk hian tuihri bakah a dang pawh a tidarh ang tih an hlau hle a. Mi tam tak chu pawnah an la inkulh lai a ni.
Magnitude 7.7-a na lirnghing khan mi maktaduai 50 chenna Myanmar sawiin state parukin an tuar na hle a, an khawpui, Naypyidaw pawh a tuar zingah a tel.
Power a awm lo va, telephone leh mobile phone connection a awm tha lo hle a, kawngpui leh lei a chhia a, thil chhiat dan kimchang hi hriat pawh a la har hle.
An rama tual chhung indona a awm mek lai a nih bawk avangin dinhmun a tiharsa zual a, indona avang hian mi maktaduai thum vel baihvaia awmin mi maktaduai 20 dawn chu puih ngai tak zet an ni sa niin UN chuan a sawi.
Sipai kaihhruai sorkar chanchinbu chuan thi hi 3,471 an nih tawh thu leh mi 4,671 an inhliam a, mi 214 chin an la hre lo tih a puang.
In 5,223, sikul 1,824, pagoda leh temple 4,817, damdawi in 167, lei 169, tuikhuah 198 leh kawngpui lian hmun 184-ah a tichhia.
A tuar na ber chu a intanna bul maia awm, Sagaing leh Myanmar-a khawpui lian pahnihna, Mandalay a ni.
Mandalay-a awm, UN aid chief Tom Fletcher-a chuan thil chhiat nasat dan chu ‘phuahchawp’ ni mai awm a nih thu a sawi a. Dam chhuakte chu hlau leh thlabara an awm thu leh ei tur, tui, awmna leh electricity an mamawh tak zet tih a sawi.
X-a video a dah chhuahah Fletcher-a chuan a nghin hnu chawlhkar khat chuangah pawh nghing nawn (aftershock) a awm reng niin a sawi a. Zirtawpnia Mandalay chhim lama nghing leh pawh United States Geological Survey chuan magnitude 4.7 niin a sawi.
February, 2021-a mipui thlan Aung San Suu Kyi-i sorkar paih thlaa sipai chakna hmanga roreltu, Senior General Min Aung Hlaing-a chuan Nilaini khan inkahhai a puang a, hetih lai hian UN Office of the High Commissioner for Human Rights chuan Zirtawpni khan sipaite hian an thunun lohna hmunah chuan puihna an kalpui duh lo niin a sawi.
UN agency hian sipaite hian anmahni duh lotute an bei nia sawi pawh an chhui zui a, inkahhai puan hnua mi pawh an en zui tih an sawi bawk.
Chhawmdawltu pawl, Free Burma Rangers chuan Inrinni khan Reuters news agency hnenah sipaite hian Ningani leh Zirtawpniah pawh khan Karenni leh Shan state-ah bomb an la thlak a, mi panga vel an thi niin an sawi.
An pawl dintu, David Eubank-a chuan thi zingah civil mi pawh an tel tih a sawi a, hetiang beihna hi inkahhai puan hnua a thlen vawi sarihna vel niin a sawi.
Myanmar thenawm ram tam tak chuan kar hmasa khan puihna thil leh chhanchhuaktu an thawn hlawm a. Khawvela mi tanpuina pe chhuak hnem ber, US pawhin $ maktaduai kua vel a pe bawk.
An ruala lirnghing tuar ve tho, Thailand-ah chuan thi 24 an awm tawh a. Heng zinga 17 hi an khawpui, Bangkok-a in sak lai chima mite an ni a. Mi 77 chin an la hre lo.