Myanmar atanga ruihhlo lo lutdang turin centre puihna ngen

Myanmar atanga ruihhlo lo lut
dang turin centre puihna ngen
New Delhi-a cham mek minister Lalnghinglova Hmar chuan Thawhlehni khan a department chan kaihhnawih ministry hotute hmu in mamawh leh tul a sawipui a. A thu thlen zingah Myanmar atanga ruihhlo lu lut thin dan kawngah pui turin a ngen.
Excise & Narcotics minister hian Narcotics Control Bureau director general Anurag Garg kawmin Mizorama ruihhlo do turin thawhhona tha zawk neih a tul thu a thlen a. Myanmar ramri kaltlangin ruihhlo a lo lut nasa tih sawiin, intelligence-sharing leh thawktute training pek kawngah Mizoram Excise & Narcotics Department thuam chak a ngai tih a hrilh.
Minister ngen angin Mizoram leh hmarchhak state danga ruihhlo kaihhnawiha thawkte tan capacity building training an buatsaih tur thu NCM hotu hian a sawi a. Aizawlah NCB Zonal office hawng tura ruahmanna a awm mek thu a lo hrilh bakah Myanmar atanga ruihhlo lo lut do kawngah tun aia inhnaih leh inpawh zawka thawhho dan an sawidun.
Sports & Youth Services minister ni bawk hian Ministry of Youth Affairs and Sports secretary (Youth Affairs) Dr Pallavi Jain Govil a kawm a. Department of Youth Affairs hnuaia thalai hmasawnna kaihhnawih activity hrang hrang chu Mizoramah nghah ve thin nise a duh thu leh, Mizoram pawn atanga thalai tam zawk hip thei turin Aizawlah Youth Hostel sak a ngaih thu a thlen. Youth Affairs secretary hian a theih anga hma an lak tur thu a sawi a ni.
Tourism minister ni bawk Lalnghinglova Hmar hian Ministry of Finance-a Department of Public Enterprises secretary Moses Chalai pawh a kawm a. Mizoram chu state tê, budget pawh lian lo tak a nih avangin, hmasawnna hnathawh kawngah Central PSE kaltlanga puihna awm theite an sawidun a ni.
Ministry of Home Affairs secretary (Border Management) Dr Rajendra Kumar nen ramria ruihhlo tawlh chungchanga thawhho theihna hrang hrang sawiin an inkawm bawk.