Myanmar-in Rohingya 1,80,000 hruai haw dawn

Myanmar-in Rohingya 1,80,000 hruai haw dawn
Myanmar chuan an ram atanga tlanchhiaa Bangladesh-a awm mek Rohingya 1,80,000-te haw a phalsak niin Bangladeshi sorkarin a sawi.
Bangkok-a Zirtawpnia an inbiaknaah rei tak chhung raltlante hruai haw dan tura inrem tuma beihna chu hlawhtlin ni hmel a hmu ta a, Rohingya-te hi an zavaia an haw leh erawh duh dan a ni la tho.
Rohingya maktaduai tel hi Bangladesh chhimchhakah awmin khawvela raltlan awmna lian ber a ni mek a. A tam ber hi kum 2017-a Myanmar-a sipaite tihduhdahna tlanchhiatsante an ni.
Nikumah pawh khan Rohingya 70,000 velin Bangladesh an la luh belh a, heng mite hi Myanmar-a Rakhine State-a an awmnaah eibar harsatna leh tharum thawhna tlanchhiatsan an ni.
Bangkok-a 6th BIMSTEC Summit neih rualin Muhammad Yunus-a kaihhruai Bangladeshi sorkar lailawk aiawh, Khalilur Rahman leh Myanmar-a deputy prime minister, foreign minister ni bawk, Than Swe inbiain Rohingya hruai haw dan turah hian inremna an nei ta tih puan zui a ni.
Hruai haw tura tih mi 1,80,000-te hi Bangladesh-in Myanmar hnenah kum 2018 leh 2020 inkara thawh ruka Rohingya 8,00,000-te hming a thawn zinga mi an ni a. Myanmar hian mi dang 70,000-te pawh an thlalak leh an nihna la en fiah ngaia an awm mek thu a sawi.
Bangladesh chuan Myanmar hian mi dang 5,50,000-te pawh hruai haw leh turin hma an la zui dawn niin a sawi tel.
Bangkok-a inbiakna chungchangah hian Myanmar-a sorkar chuan engmah thuchhuah a la nei ve lo thung.
Rohingya raltlan tam tak hian an rama kir leh beiseina hi an nei vak tawh lo va, an haw leh a nih pawhin zawi zawia chim ral leh an chanvo chhuhsak an nih tho an ring.
Kum 2018 leh 2019 khan hruai haw tuma beih tawh a ni a; mahse, an haw chuan tihduhdah an tuar leh dawn tho nia ngaiin an duh lo.
“Kum tam tak hnuah mi 1,80,000 chauh pawm an ni a. Hei hi chu engmah tak tak a ni lo, thil him tawk tak kan duh a ni,” tiin raltlan zinga mi, Shafiqur Rahman chuan Reuters news agency a hrilh.
“Myanmar hian tlem chauh ni lo, kan vaiin min hruai haw vek tur a ni a. Kan haw a nih pawhin kan dikna, kan chanvo, khua leh tui kan nihna zawng zawng min pek an intiam ve tur a ni a. Chutang a awm lo a nih chuan hetiang ringawt hi chu engmah lo a ni,” a ti.