Myanmar leh Manipur atanga sahimna zawng 28605 la awm

Sawrkar chhinchhiah danin Myanmar leh Manipur-a buaina avanga sahimna zawnga Mizoram awm mek mi 28605 an awm a. Aizawl district bikah Myanmar raltlan an awm lo nia report a ni.
Home commissioner H Lalengmawia chuan district hrang hrang bawrhsap-te inbiak hmuh theihna hmanga thutkhawm puiin kumin hunpui thleng tura an inbuatsaihna leh raltlante dinhmun an sawiho a. December 18 tlai thlenga Home department-in raltlan dinhmun report a neih danin, Manipur atanga sahimna zawnga rawn lut 5998 an awm mek a. Myanmar atanga raltlan 22607 awm bawkin, an vaiin 28605 a ni.
Report-ah hian Bangladesh atanga raltlan a awm tawh lo a. Aizawl, Kolasib leh Saitual district-ah Myanmar raltlan awm mek an awm loa; Hnahthial leh Lawngtlai district-ah Manipur atanga raltlan an awm lo ve thung. Relief camp-a awm an la awm nual a, a tam zawk erawh chhungte leh thiante bela awm an ni. Refugee camp-a awm hi Champhai district-in a ngah ber a, 6014 an awm.
Home commissioner chuan MLA inthlanpui tluang leh felfai taka district bawrhsap-ten an kaihhruai avanga lawmpuina thu sawiin, Krismas leh kumthar vuakvetah mipuiin hun ralmuang tak hnuaia hlim leh lawm taka an hman theihnan nasa taka tan la turin a chah. Hemi atana an ruahmanna siam a felfai tha hlea a hriat thu sawiin, mipui tawiawmna a pawimawh avangin khawtlang leh tlawmngai pawl nen thawhhona tha tak nei turin a chah.
Ruihhlo leh dan loa thil lakluh kawngah sawrkar thar a khauh hle tih sawiin, a bikin Myanmar atanga kuhva ro lut an ngai thutak a, a chevel reng reng chu man vek tur tih a ni a; Police Headquarters pawh hriattir an ni tawh tih a sawi. Champhai, Kolasib leh Mamit bawrhsap-te chu hemi chungchangah mawhphurhna an nei lian hle tih a sawi bawk.
Thutkhawmah hian bawrhsap hoin Krismas leh kumthar vuakveta boruak a muan theihna tura an hmalakna an sawi bakah kumin November 21-a chief secretary Dr Renu Sharma hoa Committee sang thurel an bawhzui dan an sawi a. An district theuha Superintendent of Police leh tlawmngai pawlte nen thawhhona tha tak an nei tih sawiin, ruihhlo leh a kaihhnawih laka thalaite him theih nana hma an lakna an sawi a ni.

Mizorama raltlan dinhmun:

District Manipur Myanmar Total

Champhai 407 12484 12891
Khawzawl 107 109 216
Serchhip 105 343 448
Lunglei 62 2000 2062
Mamit 164 365 529
Siaha 59 5900 5959
Aizawl 796 – 796
Kolasib 2971 – 2971
Saitual 1327 – 1327
Hnahthial – 1101 1101
Lawngtlai – 305 305