Myanmar lirnghing kha atom bomb 330 chuanga chak tluk a ni – American geologist

Myanmar lirnghing kha atom bomb 330
chuanga chak tluk a ni – American geologist
American mi thiam (geologist) chuan Zirtawpnia magnitude 7.7-a na lirnghing, Myanmar-a mi 1,700 vel thihna thleng chu atom bomb 300 chuang puak tluka na a nih thu a sawi.
“A tha chakna kha atom bomb 334-in chakna a tihchhuah hu a tling,” tiin geologist Jess Phoenix chuan CNN a hrilh.
Phoenix-i hian a hnua sawi nawn leh )aftershock) chu ‘thla khat chhung vel’ a la awm thei danw tih a sawi a. Indian tectonic plate leh Eurasian plate chu Myanmar hrulah an la innawk che zel niin a sawi.
Geologist hian tual chhung indona avangin Myanmar-a chhiatna thlen dan kimchang hi hriat a harsa mai mai zawk niin a sawi.
Hetih lai hian a natna hmun, Mandalay leh hmun dangah chhanchhuah hna thawh mek zel a la ni a; mahse, ni a liam nual tawh avang leh khaw lum lam chu 40°C hial a kal avangin in chim kara dama lak chhuah theih an awm beiseina a chau sawt hle.
Mi cheng thenkhat chu Pathianni zan khan a zan thum nan khawlaia an riak leh a, mi maktaduai 1.7 chuang chenna khawpui hi aftershock-in a la chhu zui reng bawk.
Khaw lum lutukin chhanchhuah hna thawktute chet a tisawt lo va, ruang a tawih rang sawt bawk a, hei hian tute nge an nih hriat pawh a tiharsa dawn tih news agency AFP chuan a tar lang.
Pathianni khan chhanchhuah hna thawktuten Myanmar-a khawpui lian ber pahnihnaah hian apartment block chim atangin nu nau pai lai chu lir a nghin atanga darkar 55-ah lak chhuah tuma an beih mek laiin a chim belh leh a. A ke lehlam chauh phawrh chhuak thei hmasain a hnua a taksa an phawrhah a lo thi hman tawh a ni.
“Chhanchhuah tumin kan theihna zawng zawng kan chhuah a ni,” tiin damdawi thiam pakhat chuan AFP a hrilh a, a ke a bunnaah thisen a hloh hnem em avangin an chhan thei ta lo tih a sawi.
Hetih lai hian Muslim-te chu lir a nghin hnua a vawi khat nan mosque chim chhe tawhah an pungkhawm a. Anni hi an thla thianghlim, Ramadan hmang mekin Eid al-Fitr pualin Thawhtanni tuk khan an tawngtai a ni.
Lirnghing avanga thi eng emaw zat chu Thawhtanni khan vui an ni.
Tar lan tawh angin magnitude 7.7-a na hian Mandalay bula intanin Zirtawpni chhun lai pelh hretah a sawi a, minute rei lo te hnuah magnitude 6.7-a nain a sawi leh a. In a chim a, lei a chim a, kawng a khi a, Myanmar lailiah phei chuan an tuar na hle.
International Federation of Red Cross & Red Crescent Societies chuan Pathianni khan a tuartute chhawmdawl nan hian $ maktaduai 100 chuang mamawh a nih thu an sawi.
Khawvela mi tanpuitu pawl lian ber hian khua a lum chho zel a, ruahtui a tlak zui mai dawn bawk avangin ‘a hnu leh chhiatna’ a thlen a hlauhawm tak zet tih ans awi.
Asia chhimchhak rama mi maktaduai 50 chuangte hian lir a nghin hma pawhin harsatna nasa tak an nei sa a. Kum 2021-a sipaiten thuneihna an chan hnuah anmahni duh lotuten bei letin tual chhung indona karah kum li zet an lo awm tawh a ni.
Lirnghingin a tihbuai mek lai hian hmun thenkhatah inbeihna a la awm reng nia sawi a ni a. Pathianni khan sipai sorkar beitu hel pawl pakhat chuan lir a nghin hnua sipaiten thlawhna hmanga an beihnaah an pawl mi pasarih an thi tih AFP an hrilh.
Lir a nghin hma khan mi maktaduai 3.5 vel chu tual chhung indona avangin baihvaiin an awm a, tam mai thei dinhmunah an ding sa a ni.