Myanmar president lak luhnaah MoS-in India aiawh dawn
Myanmar president thar, Min Aung Hlaing-a lak luhnaah India aiawhin Minister of State for External Affairs Kirti Vardhan Singh-a a tel dawn a, Nay Pyi Taw-ah hruaitute a kawm ang a, sumdawnna leh hmasawnna lama tanpuina kawnga ram pahnihte inkar a sawipui ang.
Singh-a hi Nilaini atanga Inrinni thleng Myanmar-ah hian a châm dawn a, Ningania Nay Pyi Taw-a lak luh inkhawmah a tel dawn tih external affairs ministry (MEA) chuan Thawhtanni khan a sawi.
Myanmar sorkar sawmna anga tlawhtu tur, Singh-a hian Nay Pyi Taw-ah sorkar hotute a kawm ang.
Sumdawnna, sum leh pai, leh hmasawnna lama tanpuina hmalakna kaihhnawih inbiakna a neihpui dawn a, Yangon-a Indian awmte nen pawh a inkawm dawn tih ministry chuan a sawi.
Tun thleng hian India sorkar chuan tun hnaia Myanmar-a inthlanpui neih chungchangah emaw, February, 2021-a Aung San Suu Kyi-i sorkar paih thlatu, General Min Aung Hlaing-a kaihhruai sorkar thar din chungchangah emaw engmah sawi a la nei lo.
Min Aung Hlaing-a hian president thlanna chuh turin thla hmasa khan sipai a chawlhsan a ni.
Lak luh inkhawma Singh-a a telna hian New Delhi-in sorkar thar nena inzawmna neih a duh tih a tilanga ngaih a ni a, hei hi India-in hmarchhaka himna a ngaihtuah vang a ni ber a. Hmarchhak state-a hel pawl eng emaw zat chuan Myanmar ramri hrulah awmhmun neiin an hma an la reng hlawm a ni.
Kum 2021-a sorkar paih thlak a nih hnuah Min Aung Hlaing-a chuan kum khat chhungin inthlanpui neih a tiam a; mahse, kum nga hnuah chauh inthlan hi neih a ni.
Mi thiamte chuan inthlan result hi a dik tawk lo hle niin an sawi a, Myanmar sipaite hian parliament thara seat hmun lia hmun khat an la a, sipai thlawp Union Solidarity & Development Party chuan seat dang 80% vel an la bawk.
Myanmar eibar dinhmun pawh a chhe hle a, October, 2023 khan sipai sorkar duh lotu hel pawlhrang hrangte chuan inremna siamin sipai lakah beihpui an thlak a, tual chhung indona nasa tak a chhuak mek.
India chuan Myanmar rama venhimna dinhmun chhe zel chu a ngaihtuah fo thu a sawi a, politic-a inhnamhnawih zawng zawngte chu mipui rorelna ram an nih leh theih nana hma la turin a ngen bawk.
Get real time updates directly on you device, subscribe now.