Myanmar scam centre chhuahsan Indian hruai haw belh

Myanmar scam centre chhuahsan Indian hruai haw belh
India chuan Thawhtanni khan Myanmar scam centre atanga chhuak, Thailand-a kal zui ta a ram mi 197 chu a hruai haw leh belh leh a, mi 467 a hruai haw ta.
Indian khua leh tuite hi Thai ramri khua, Mae Sot atangin Indian Air Force (IAF) thlawhna pahnih hmangin phurh haw an ni tih Bangkok-a Indian embassy chuan X-ah a tar lang.
India hian kar kal ta atang khan Thai thuneitute nen inrawnin Myanmar sipaiten Myawaddy khuaa cyber scam centre tawp tak, KK Park an luhchilh atanga a mite chhuak, Mae Sot pana kalte hruai haw turin hma a la tan.
Indian palai, Nagesh Singh-a chuan Thai Prime Minister Anutin Charnvirakul-a pawh biain Thawhtanni chawhnua Mae Sot atanga phurh chhuah an nih lai pawhin a awm a. Anutin-a hian Thailand chuan Indian sorkar hmalakna a ngaih pawimawh thu leh Mae Sot atanga an mite hruai haw tuma hma a laknaah Thai thuneitute chuan puih zel a inhuam tih a sawi niin Indian embassy chuan a sawi.
Indian-te hi Myanmar-a Myawaddy atanga an chhuah hnuah Mae Sot hi dan lova lutin lo hren an ni a, cyber-scam centre-ah hian an thawk nia rin a ni a. Thai thuneitute chuan dan lova an ram an luh avangin an lo man tih an sawi.
Bangkok-a Indian embassy leh Chiangmai-a consulate chuan Thai sorkar dawrin hruai haw dan an dap zui a. “Indian-te hi ram danga hna thawka an awm dawnin thil tul leh pawimawh, a chhawrtu turte pawh hriat chian hle zel tur a ni,” tiin embassy chuan a sawi.
“Visa ngai lovin Indian passport neih chuan Thailand hi zin leh sumdawngin a tlawh theih reng a, hei hi tam takin hna thawh tuma luh nan remchangah an hmang thin,” an ti bawk.
Ningani khan IAF thlawhna pahnih hmangin hmeichhia 26 telin Indian 270 hruai haw an ni tawh a. Thai chanchinbute chuan thla hmasaa Myanmar scam centre luhchhuah a nih hnuah khan Indian 450 chuangin Thailand an pan niin an tar lang hlawm.
Indian-te hi thenkhat chu mi sualin hna tha tak zawrha bum chhuaka scam centre-a an tantirte an ni a, thenkhat erawh hetiang dan bawhchhiatna thila tel vea inhnamhnawih an ni hlawm.
Hruai haw zawng zawngte hi Indian thil chhutute inbumna thila an inhnamhnawih dan te, KK Park-a an awm theih dante an zawtin an chhui mek hlawm.
Thai chanchinbute chuan KK Park luhchilh a nih hnuah khan hmeichhia 256 telin ram hrang hrang mi 1,595-in Thailand an pan a, a tam ber hi Indian an ni tih an tar lang.
Myanmar-ah hian KK Park ang chi, mi sual rualin dan bawhchhiaa thiltihna hmuna an hman ang hi a awm nual a. Heng hmunte hi Chinese mi sual pawlin ram danga an thawhpuite nena an kalpui a ni a, inbumna hmun lian tak a ni ber a. A hung chhung pawh hi tual chhung hel pawl, Myanmar-a sipai commander-te nena inzawmna neiten an veng thin.
March thlaah pawh khan India chuan Myanmar-Thailand ramria cybercrime centre atanga lak chhuah mi 549 chu sipai thlawhna hmangin a lo hruai haw tawh a ni.