State Assembly inthlanah hnamdang pasal nei in candidate tum an awm a nih chuan Mizo Zirlai Pawl-in a tawp thlenga dodal an tum thu an pawl president Lalnunmawia Pautu chuan a sawi.
June 30 zana Remna Ni denchhena MZP Gen. Hqrs. in hun a buatsaihah MZP president Lalnunmawia Pautu chuan Sap pasal a ni emaw Vai a ni emaw pasal neite kan ram rorelna sangah thut tuma bei an awm, tia sawiin, “MZP chuan ngun takin a ngaihtuah a, Mizo pi leh pu, sipai huaisen, hnam pasaltha ten zalenna, rorelna an sualchhuahah hian an thut ve a rem lo,” a ti. MZP chuan theihtawpin an theihna apiangah an dodal zel dawn tih a sawi.
An hmalakna avang hian MZP chuan sawisel, diriam leh chirhtheh an tawk nasa a, pawi erawh an ti lo tih sawiin, “Hnamdang pasal neiten seat an chang a, rorelna sanga thut an tum chuan theihtawpin kan theihna apiangah kan dodal zel dawn,” a ti.
Nationalism lamah nasa takin MZP chuan ke a pen a, culture venhim kawngah pawh hma an la thin tih MZP president hian sawiin, changkanna, hausaknate chu rawn lut mah se, ram leh hnam a ral chuan an tawrh nasat zual zawk an hlauh avangin theihtawp chhuah an ni tih a sawi.
Tunhnaiah sawrkar hnathawk pension kum tih san tumna a awm a. Thalai hna zawng tam tak, thiam tak tak an awm lai a, pension kum tihsan tumna chu MZP chuan a tawp thlengin a dodal dawn tih MZP hruaitu hian a sawi bawk.
MZP-in MLA inthlanah hnamdang pasal nei candidate dodal tum
Get real time updates directly on you device, subscribe now.