MZP-in scho’ tur buaipui

MZP-in scho’ tur buaipui
Scholarship la sem zawh loh sem thuai a nih theih nan Mizo Zirlai Pawl chuan sawrkar laipuiah a buaipui a. Sem hmabak atangin cheng vaibelchhe 24 an sanction leh thuai dawn tih hrilh an ni.
Sawrkar laipuia Ministry of Tribal Affairs-in tribal scholarship (Post Matric) sem bang Mizoram sawrkar a la pek loh avanga sem chhunzawm theih loh chu MZP hruaituten hriatchian tumin Nilaini khan New Delhi-ah Ministry of Tribal-a scholarship khawihtute a dawr a. Zirlaite mamawh dan sawipui an ni a, sum pechhuak thuai turin an ngen.
Ministry of Tribal Affairs hotute chuan sum la mamawh atanga cheng vaibelchhe 24 chu a rang thei ang bera an sanction tur thu an lo hrilh a. Hei hian zirlaite mamawh zawng zawng a la daih dawn lo deuh niin an sawi.
Heng sum hi Mizoram SNA (single nodal agency) account-a a luhfel hunah Mizoram Scholarship Board-in SMS leh PFMS leh thil tul hrang hrang an buaipui anga, zirlaite account-ah a luh thuai theih nan MZP chuan a enzui zel dawn tih an sawi a ni.
Mizoram zirlaite chanvo tribal scholarship 2023-2024 hi vawi khat sem a ni tawh a. Mi 6000 velin dawngin, cheng vbch.7 vel sem tawh a ni.