MZP-in Zoram Ni hmang

MZP-in Zoram Ni hmang
1966 March 5-a bomb hmanga Mizoram beih a nih champha ‘Zoram Ni’ tia Mizo Zirlai Pawl-in a hman zui chu Nilaini khan Aizawl leh Lungleiah hman a ni.
MZP Gen. Hqrs buatsaiha Aizawla hmanah hmanpuitu Rajya Sabha MP K Vanlalvena chuan, India independence movement-ah Mizote kan tel loh avangin India danpuiah Mizote himna tur a awm loa. Chuvangin, Mizo independence movement a lo piang a. Mizoten kum 1966-a zalenna a puan hi jet fighter meuh hmanga hmeh hmih tum a ni hian, he movement nep loh zia a tilang tih a sawi.
“Mizo independence movement hi hlawhtling chiah lo mah se, Mizote himna tur hi chiang takin India danpuiah tarlan a nih phah a. Kan ram leh sakhua humhim hi kan mawhphurhna a ni. Tunhnaiah kan unau Manipur, Burma leh Bangladesh atanga rawn raltlante ngaihtheih lohna leh hmuhsitna sawi a tam hle a. Hetiang mite hi a tlangpuiin Vai nationalism-in a chhumhminte an ni tlangpui. Tunah keini him angin lang mah ila, engtik niah emaw chuan kan unau, tuna kan mikhualte hi kan la belh hun a la thleng loang tih a sawi theih loh. Chuvangin, chapo thei kan ni lo,” K Vanlalvena hian a ti.
MZP president H Lalthianghlima chuan Zoram Ni atang hian hnam hmangaihna nei thar tura mitin sawmin, “Kan hnam tawrhna atangin hmalam pan ang u,” a ti. Kum 1966 khan Mizoten zalenna famkim nei turin hma kan la a, Indian kan nih loh hlauin jet fighter meuh hmangin min bei a. Kan ram kan intodelh hmaa min enkawl hi central India mawhphurhna a ni. Mizoram ram ralmuang kan ni chung a, Enforcement Directorate leh National Investigation Agency te kan ramah an rawn sapatal hi pawi kan ti a. Mizoramah duh duha an rawn tal zel a nih chuan, MZP-in nasa takin kan la dodal hun a awm ang, a ti.
Kum 2008 atangin MZP-in Zoram Ni hi a hmang tan a. Kumin Zoram Ni thupui “Tho la ding ta che” tih hmangin Lengzem editor Vanneihtluanga thu a sawi. MZP chhungkua bakah, college hrang hrang zirlaite leh NGO hrang hrang aiawhte an tel a. Zoram Ni puala article inziahsiak leh reels insiamsiaka lawmman sem a ni.
Lungleiah pawh MZP Hqrs. Lunglei huaihawtin Zoram Ni hman a ni a. An adviser Lalpeksanga Chenkual chu resource person niin, Zoram Ni-ah hian MZP chuan political party inchirhthehna leh party hamthatna lak tumin tumahin hmang lo se a duh tih a sawi a. Hnam anga thangharh a, mimal chibil angin ram ropui kan din theih dawn loh avangin hnam anga tanrualna atan hi hman tum turin a chah tih a sawi a ni.