MZU Virthli Runway Showdown
Escape Engmawia show-ah Urfi Javed inlan
Zirtawpni kalta khan Mizoram University (MZU) Virthli-a Runway Showdown-ah India milar Urfi Javed a inlan a, lawm a hlawh hle. Runway Showdown-ah hian Mizo designer hriathlawh ber zinga mi Escape Engmawia kutchhuak inbelin model leh zaithiam bakah lamthiam te an inlan a, Urfi pawh hian Engmawia kutchhuak a nibel a ni.
Virthli Runway Showdown-ah hian Urfi Javed hi show stopper niin, sawi lawk awm vak lo a inlan a ni bawk a, boruak a siam hle a, ani bakah hian Mizo hmeichhe zaithiam, hranghlui chan chang ve tan deuh tawh Mimi Renthlei a inlan bawk a, ani hian ‘Tunge Ruati I Ngaihzawng’ tih hla sain, Mimi pawhin a thiam a la theihnghilh lo a, lawm a hlawh hle.
Show-ah hian Zai Hauchhum leh Ruatpuii an zai bawk a, anni bakah hian Dodoo Vangchhia a perform bawk. Dodoo hi Escape Engmawia nau, an unau zinga naupang ber niin, Amity University, Delhi-a law zirlai niin, ani pawh he event a zai tur hian a rawn haw vang vang a ni.
Urfi hi Engmawia hian ama sum senga a chah chhuah niin, a takah chuan IG leh social media lama an nun kan hmuh ang a nih loh thu sawiin, “A fel khawp mai. IG leh reels vela kan lo hmuh ang an ni lo. Airport an rawn thleng atangin, local deuh deuhah chawlh ka duh a tia, kan ei ang te a ei ve chhin vek a duh a. Ei leh inah pawh a buaithlak lo, ‘Engmah ka care lo, eng sa pawh ka ei thei vek,’ a ti a. Lengpuiah vawk kawchhung kan ei pui a, a ei ngai loh thil a nih avangin a kuain a tuar a, show neih niah pawh pum nuam lo chungin a tel phah ta a ni,” a ti.
Engmawia chuan Urfi’n Aizawl nuam a ti niin a sawi a, “Amah kha lo buaipui vel a buaithlak lo a, engkawl a nuam. Mizoram nuam a ti a, ‘Mizo in felin inchangkang, inthliarna a awm lo a, inang khatin inawm a a nuam,’ a ti,” a ti bawk.
Runway Showdown a inlan te thawmhnaw zawng zawng hi Escape Engmawia kutchhuak vek a ni a, model te bakah zaithiam leh lamthiam te thuam pawh a buaipui vek a, Urfi thawmhnaw hak tur pawh chawpchilh takin an buaipui a, Engmawia chuan Urfi kawr hak tur an thui dawnah a measurement engmah an la lo ni a sawiin, “A san zawng ka zawt a, chumi atang chuan ka chhut mai,” a ti a. A thui dik thlap tho!
Engmawia chuan Urfi an chah chhuah theih dan sawiin, “Anni ang milar hi sawm an har khawp mai. Mumbai a ka thianten a manager phone number min pe a, anin a manager a lo thlak si a, a manager thar phone number ka neih leh hnuah nikum lam atang khan kan inbe tawh a. Nikuma show kan neihah kan lo kal turin kan sawm tawh zawk a, mahse, reality show atana shooting an neih lai nen a innang a, a rawn kal thei ta lo.
“Biak pawh hi an har khawp mai a, an pawisa hmuhna tur pawh ni se event zawng zawngah hian kan kal vek bik lo a. Ka IG te min zawt a, an lo endik a, kei hi vanneihthlak takin national bakah international level-ah te ka lo kual ve nual tawh avangin anni pawh an phur leh ta zawk a. A tirah chuan Mizorama kal tura sawm khan an pur em em lo a, ka kutchhuak leh show neih tawh te an en atangin an phur ve leh ta deuh zawk a ni,” a ti.
Virthli Runway Showdown-ah hian Engmawia chuan a tel lo tep niin a sawi a, “Virthli show-ah hian kum hmasa lama te eng emaw boruak deuh te a lo awm tawh avangin show buatsaih dawnah pawh an fimkhur tawh khawp mai a. An programme duan te lo endik lehtu te an awm tawh a. Keipawhin show ka neih dawnah ka model hman tur leh zaithiam zai turte ka theh lut vek a. Chuta tang chuan a endiktu lamin mi panga an lo reject a. In cut sak kha ka duh bik lo a, show neih loh law law te pawh kan ngaihtuah hman a, mahse, Urfi kan lo be tawh si a, ani a lo kal a ngai tho si a, show dang siam mai te kan rilruk hman a. Show neih hun hma ni thum vel chiah a awm tawh tihah kan final thei chauh a ni,” a ti.
-- Advertisement --
Urfi Javed hi Lucknow, Uttar Pradesh-ah October ni 15, 1997 a piang niin, Amity University, Lucknow atanga mass communication graduate niin, Indian internet personality leh television actress a ni a, fashion dangdai tak tak inbel a chin vang leh social media lama thawm a ngah thin avanga hriathlawh tak a ni.
Soap opera velah a inlan thin a, mahse, a rawn lar chhuah tak takna chu 2021-a Voot reality show Bigg Boss OTT 1 kha niin, hei bakah hianah film ‘Love Sex Aur Dhokha 2’-ah changin, reality series ‘Follow Kar Lo Yaar’-ah a inlan bawk.
Lemchan lama a bul tanna chu 2016 kha niin, Sony TV ‘Bade Bhaiyya Ki Dulania’-ah Avni Pant lemah a chang a, 2016-2017 chhungin Star Plus show ‘Chandra Nandini’-ah Chhaya lem a chang a, ‘Meri Durga’-ah Aarti lemah a chang bawk. 2018-ah SAB TV show ‘Saat Phero Ki Hera Pherie’-ah Kamini Joshi lemah a chang a, Colors TV ‘Bepannaah’-ah te changin, 2020 khan Yeh Rishta Kya Kehlata Hai-ah Shivani Bhatia lema changin, Kasautii Zindagii Kay-ah Tanisha Chakraborty lem a chang bawk.
2021-a Voot reality show ‘Bigg Boss OTT’ chu a lar chhuah tak taknain, 13-na a ni a, 2022 khan Indo-Canadian singer Kunwarr-a music video-ah inlanin, December 2022-ah MTV India reality show ‘MTV Splitsville X4’-ah a inlan bawk. December 2022 khan Urfi Javed hi Asian zinga Google kaltlanga zawn hlawh ber te pawh a lo ni tawh bawk.