Na leh zau zawka Gaza bei turin Israel-in a reserve sipaite ko

Na leh zau zawka Gaza bei turin Israel-in a reserve sipaite ko
Israeli sipaite chuan Gaza-a beihpui a thlak mekah ‘nasa leh huam zau zawka chet nan’ a sipai reserve sang tel a la lut.
Israel Defense Forces (IDF) chuan Gaza-a mi hrente an lak chhuah ngei theih nan leh Hamas an hneh ngei theih nan ‘na zawka nawr’ an tum tih a sawi.
Ruahmannaah chuan sipaite hi hmun tharah beihpui an thlak ang a, lei chung leh a hnuaia ‘thil ding zawng zawng tihchhiat’ an tum a ni.
March 18-a Hamas nen thla hnih chhung inkahhai an puan a tawp hnuah khan Israeli hren mekte zinga mi chhuah an la awm leh lo va. Israel leh Hamas hian inkahhai tawp chhanah hian an inpuh ve ve.
Hemi hnuah hian Israel hian Gaza ram zau tak luhchilh leh tawhin Gazan sang tel chu an tlanchhe thar leh.
March 2 khan Israel chuan Gaza luhna kharin bungrua, ei tur, tuialhthei leh damdawi a lut thei tawh lo va. Puih hna thawktu pawl hrang hrang chuan ei tur a zo dawn tih an sawi hlawm.
Ram tam takin Israel chu an kawng dan hawng turin an ti a, tampui mitthi a thlen chuan civil mite an thih chuan indonaa dan bawhchhiatna lian tak a ni dawn tih an sawi.
Israeli thuneitute chuan Hamas kuta la awm mek mi 59 chu chhuahtir vek an tum a, an zinga 24 hi an la dam nia hriat an ni.
Tual chhung chanchinbute chuan Gaza-a sipaite thapui thawh thar leh tura ruahmanna hi Zirtawpni khan Prime Minister Benjamin Netanyahu-a hnenah pawh thlen tawh a nih thu an tar lang.
Hetih lai hian tun hnaiah Israeli sipai reserve sang tel chuan Netanyahu-a sorkar chu indona titawpa mi hrente chhuahna tura inremna lam ngaihtuah zawk turin an lo ti tawh.
Inrinni zanah pawh khan Israel hmun hrang hrangah indona titawp tura nawrna a awm leh bawk.
Tel Aviv-ah chuan mi hren zinga mi nu chuan ‘indona tul lo’ tiin a sawi nghe nghe.
Gaza-ah hian Hamas enkawl health ministry chuan an rama Pathianni chawhma dar 11:05 khan a hma darkar 24 liam ta chhungin mi 40 thi awm lehin mi 125-in hliam an tuar niin an puang.
Israeli sipaite hian Hamas-in October 7, 2023-a an ram beia mi 1,200 chuang an thah leh hren tura mi 251 an hruai phuba lain beihpui an thlak mek.
Hamas health ministry chuan Gaza-ah hian mi 52,535 an thi tawh niin an sawi a. Heng zinga 2,436 hi March 18-a Gaza Strip-a Israel-in beihpui a thlak thar leh hnia thi an ni tih an sawi bawk.