Nadal-a khelmual luh hun a chiang ta

Nadal-a khelmual luh hun a chiang ta
Kumin January thla hnu lama tennis inelna la hmachhawn leh ta lo Rafael Nadal chuan kum thar January thla Australian Open hi khelmuala kirlehna atan a thlang fel tih nimin khan Aus-tralian Open tournament director Craig Tiley chuan a sawi.
Kum 37-a upa ni ve tawh Spaniard hian kumin Australian Open second round-a a tlawm Tum khan a khel bawr a tina a, June thlaah an zai a, khelmualah a inlan thei ta lo vang vang a; Grand Slam title 22 a lak tawh pawh a chhunzawm thei ta reng reng lo a, a nihrualpui Thin Novak Djokovic pawhin a kalsan duai tawh a, world number one nihna pawh a changlet thei ta lo.
The Today Show kaltlanga Nadal-a kir hun puangtu Craig Tiley chuan tunhnai ni reilote kaltaa Spaniard a biakpawh thu leh a kir tur thu an nemngheh theih tak dan a sawichhuak a, kum 2022 champion hmel an hmu leh thei tur chu a phurawm thu a tarlang tel.
Tiley hian January thlaa a khup na an zai hnua kephah hliam-in a tlakbuak zui leh Australian Nick Kyrgios pawh Melbourne Park Grand Slam-a a inlan mai theih thu tarlang telin, “Nick pawhin training a zawm leh thei tawh a, ani pawh hi lokir thei tawh se kan duh hle a, chu chu i beisei phawt teh ang u,” a ti.
Hliamin a kalsan hleih theih tak loh Nadal hian 2024 season zawh hnuah chuan chawlh lam a hawi ve mai theih tawh thu tunhnaiah sawi-chhuakin, a hliam thawhsan hleih theih loh avang hian Tour-ah a inlan ThaThum thei ta lo a, ATP ranking lamah pawh world number 240-na ni duai tawhin, a theih loh hlan hian Grand Slam lak tam lama a nihrualpui Thin Djokovic chuan kalsanin record a malkhalh a, Grand Slam title 24 nen Serb hian mipa tennis player ropui ber nih hlenna kawng a la zawh kal mek a ni!
Nadal hi Australian Open-ah vawihnih champion tawhin, he title a lak hnuhnuber chu kum 2022 final-a Russian Daniil Medvedev a hneh kha niin, kha hnehna avang khan Open era-ah Australian Open final set hmasa pahnih hloh zet chunga hnehna changlet leh thei hmasaber nihna a chang zui nghe nghe.
Nakkum Australian Open hi a vawikhatna atan ni 15 chhunga khelh turin an ruahman a, hei hi a chhan bulpui ber chu Melbourne Park-a zanrei tak tak awh match awm Thin pumpelhna atana an tih a ni.
Kumin Australian Open-ah khan Novak Djokovic chuan he tournament-a champion ngunber anihna record pawtseiin a vawi 10-na atan title a hlawhchhuak a, hmeichhe singles lamah Aryna Sabalenka chuan a career-a a Grand Slam singles title hmasaber a lakna a ni ve thung.