Nagaland-a tour hlawhtling Aizawl FC
India champion hlui Aizawl FC chuan NE huap Football For Peace and Development Initiative Project an siam a, Nagaland-ah bul tanin, ni 10 chhung an cham ang.
Mizo team hian Nagaland Inter-District Football champion ni lai Mon District chu ni June ni 2, 2026 khan Mon Football Ground-ah exhibition match khelhpuiin, Naga-ho lakah 7-1 hnehna an chang phawt.
Mon District IX leh Aizawl FC inkhel hi mipuiin an hlutin entu an am hle a; Konyak nula zaithiamin Mizo hla a sa a, Aizawl FC player-te’n an lo zaipui chuan mipui lawm a hlawh hle.
Aizawl FC zin chhuak hi Nagaland sorkar ruahman angin Nagaland Football Association, district football association leh district administration lamin an lo dawngsawng a ni.
Main event chu…
Ruahman lawk angin Dimapur khawpuiah ni 6.6.2026 zan khan Nagaland United SC nen an inkhel leh a; he match hi Aizawl FC chuan an assistant coach thin fam ta N. William Koso tan an hlan.
He match hi a hmunah Nagaland chief minister Nepheu Rio, Dy. CM TR Zeliang leh Dy. CM tho A. Patton bakah minister engemawzat leh MLA te, NEC Shillong hotute pawhin a hmunah inkhel an en.
Aizawl FC neitu Robert Romawia Royte leh a nupui bakah AFC fans engemawzat Aizawl atangin an tel bawk.
Aizawl FC-in Football For Peace and Development program an kalpui mek hi NEC Shillong leh Nagaland sawrkar bakah company engemawzatin an sponsor a; he match hian thupui hlu tak ‘Peace Pays’ (Remna hi a hlu tak zet) tih chu hman a ni.
He project atan hian NEC Shillong chuan Rs. 10 Lakh a sanction a, Nagaland United lamin a bak sum mamawh chu an ngaihtuah thung a ni.
Khatih laia Indian top flight a la nih laia I-League lama Aizawl FC an champion kum (2017) khan India chu world ranking-ah 96-na niin, Aizawl FC hian Asia level-ah AFC Champions League playoff khelin Iran club lian Zob Ahan an hmachhawn a nih kha.
AFC playoff-a Zob Ahan laka 3-1-a an tlawm avangin Aizawl FC khan AFC group stage an khel zui a, tun thlengin NE India atanga Asian level league khel awmchhun an la ni.
Tunah hian academy changtlung zawka kalpui tumin hma an la mek a; Malaysia, Dubai leh New Delhi atang pawhin thawhhopuia sawmna an dawng hial a ni.
Nagaland tour -a Main Event Nagaland United SC leh Aizawl FC-te inkhel hi a hmuhnawm hle a, TV leh Youtube lama entu pawh an tam hle a ni.
Si hnih faia Aizawl FC chakna goal hnih hi Zomuana leh Felate pet goal a ni.
Aizawl FC hian remchang hmasaah Tripura leh state dangte tour leh an tum.