‘Nakkum hi ka career tawpna a nih tawh hmel’ – Nadal

‘Nakkum hi ka career tawpna a nih tawh hmel’ – Nadal
Novak Djokovic nen mipa tennis player zinga grand slam singles title la hnem ber ni mek Rafael Nadal chuan tun May ni 28 atanga June ni 11 chhunga khelh zawh tur French Open-a a inhnuhdawh thu a puan rualin 2024 season tawp ruala tennis inelna a chawlhsan ve tawh mai theih thu a tarlang tel!
Paris khaw clay-court grand slam title la hnem ber nia French Open trophy tum 14 tehreng hawn tling tawh Spaniard chuan a dan pangngaia inphahhniam diau chungin a tel leh tel lo Roland Garros chu a ngai reng dawn tih sawi chungin, “Champion thar an lo chhuak dawn a, he tournament hi a hlawhtlin ngai rengin a hlawhtling zui zel dawn tih ka chiang,” a ti.
Champion lai Nadal tel lo French Open chu ho hulh, ngui deuh ruai tura ngaihna a pian laiin he hmuna hun rei tak lal lo hrawt tawh hian kumin tournament-a a chhuah leh chhuah lohin Roland Garros ropuina a tidanglam dawn lo tih a sawi phal a, chutih rualin 2024 season tawp ruala professional tennis chawlhsan chungchang a ngaihtuah ve ta tih a sawi!
Kum 20 zet claycourt season lo awpbet tawhtu Nadal hian grand slam title 22 a dahthat tawh zinga a hmasaber kum 2005-a Paris khawpuia a sualchhuah atang khan kumin tin Roland Garros tournament hi a la khel ziah a, kumin erawh hliam avangin a inlan thei dawn ta lo a, nakkum lamah hian a career thlahna atan a inlan thei dawn em a la chiang lo.
A chawrchhuahna Spain ram khawpui pakhat Mallorca hmuna tennis academy a dinna hmunah Ningani khan Nadal hian news conference koin, he hunah hian a hmalama a hawi lam tur sawichhuakin, “Kum tharah hian 100% fit chunga khelmual luh theih ka han beisei leh chhin phawt a, nakkum hi ka professional career tawpna tur a ni tawh hialin ka ring.
“Australia leilunga ka hliam intan khan tun thlengin min la kiansan hlei thei lo a, ka hmachhawp tamtak pawh ka hawi thei ta lo a, Roland Garros pawh beisei ngaihna a awm ta rih lo,” a ti.
Nadal hian damchiang tura chawlh rih a mamawh thu sawiin, a farewell season-a tha taka inlan a duh tih leh a kir hun tur a sawi mai theih rih loh thu tarlang tel chungin a taksain a tlin dan a zirchian rih phawt a tul thu a sawi.
Kum 36 mi ni ve tawh hian, tarlan tawh thin angin, Djokovic nen men’s record 22 slam title an kawl dun mek a, tuna a dinhmunin hma a sawn loh chuan level sang bera beisei leh a harsat a rin thu leh grand slam dang chuh leh tura kawng a inhawn a rin loh thu sawilang telin, a kum hnuhnungbera level sang ber khel leh thei turin theihtawp a chhuah zui zel dawn tih chin bak sawi ngam a nei rih lo.
French Open organiser lam pawhin Nadal-a thusawi behchhan hian thuchhuah Twitter kaltlanga siam zui ve nghalin: “He thutlukna siam harsat dan tur hi kan hriatpui a che. Kumin Roland Garros hian a ngai dawn che a, khelmuala khawng zawka kirleh thei turin lo inenkawl tha teh khai. Kum tharah hian Paris-in a lo beisei dawn che a nia,” tiin.
French Open khelh tan hmaa world number one luahkir leh tur Spaniard Carlos Alcaraz leh world number three Daniil Medvedev pawhin pangngai taka Nadal kirleh thuai an beisei thu an sawi ve bawk.
Nadal hian a kephah na kumhlun thawhsanin nikum French Open final-ah Casper Ruud a rawn hneh zuai a, mahse, hliam damchiang hlei thei lo a nih avangin a na a rawn chhuak leh thin a, kumin January thla khan second-round match pakhata Mackenzie McDonald a hneh loh tumin a khel bawr a tina leh a, a Melbourne Park title pawh hum thei loin a tla a, khami achin tun thlengin inelna a hmachhawn leh thei ta rih lo tluang zel.
Nadal hi a tirah kha chuan chawlhkar riat chawl tura ngaih a ni zet a, mahse, Indian Wells, Miami, Monte Carlo leh Barcelona a hawisan hnuah pawh tun season Madrid leh Rome-a claycourt tournament-ah a inlan thei lo a, a title kawl lai hum turin Paris pawh a thleng zo leh dawn ta lo zel a ni.
French Open title 14 la tling chungin Nadal hi major tournament pakhat bika champion ngun ber a ni a; Paris bikah hian match 112 chak tling tawhin, vawithum chiah a la tlawm a, Roland Garros-a a record ropui em avang hian ‘King of Clay’ tih a ni kumkhua nghe nghe.
Kumin March thla khan kum 2005 hnu lama a vawikhatna atan world ranking top 10 pawn lamah a tawlhchhuak a, tun dinhmunah 14-na a luah mek.