RUAL AWH A NA

By: Mahmuaka Chhakchhuak
Cho phak loh tur cho chu retheihna mai mai a ni tak nain kan ram, Mizoram tana tih theih ve reng tura ngaih hi ram dangah chuan an lo tih ve mai thin avangin rual awhna lam hawi han sawi teh ang.
Delhi khawpuiah ni hnih khat lek kan cham nain kan mitin a hmuh leh kan bengin a hriat thil tam tak zingah kan ram tana awh tak tak thil a awm a, chungte chu tih theih lohna tur engnge awm tia han ngaihtuahin kan tana thil harsa tura ngaih pawh ni lo thilte pawh a lo nih zel bawk avangin chungte zinga pakhat chauh chu ngawihbopui mai loin han sawi ta ila; Traffic Jam avangin Delhi khawpui hi buai tur nisela chuan Aizawl khawpui aia Jam ngun turin Lirthei hi a let engngemaw zatin a tam daih zawk. Tunhma lamah chuan Kolkata, Chennai leh Mumbai khawpui pathumtea lirthei awm aiin Delhi khawpuia lirthei awm hi a tam zawk tih thin reng a ni. Chutiang lo deuhin in khata chengte hian an chhungkaw zat zel lirthei an nei tih a ni bawk a, a dik leh dik loh chu hre chiah lo mah ila an kawngpui zau tak tak, Six lane leh Four lane tih vela engtik lai mai pawha Lirthei heti zat tlan dul dul an awm reng hi chuan a tlem hauh lo ang tih a rin theih mai. Hetiang taka lirthei a tam chunga Traffic Jam a awm lohna chhan chu Traffic Duty an taihmak vang leh an pawisa inchawitir tam vang a ni chiah loin lirthei khalh tute’n dan an zawm that vang niin a hriat zawk. Traffic Police duty lai hi tum thum emaw ka hmu a, pakhat chu kawngpui sira vawt ti hmel taka lo ding niin chu pa chuan lirthei tlan lam pawh ngaihsak hmel loh takin kawngsirah alo awm a. Ka hmuh leh pahnihte chuan kawngpui laiah hian an lo titi mawlh mawlhin an lo nui a, lirthei tlan lai reng reng an ngaihsak lo. Ka hmuh leh pakhat pawh chuan Traffic form ha chungin alo thu mai mai bawk a. Heng ka hmuh chhunte hi an duty uluk loh lai ka hmu fuh mial pawh a ni mai thei nain Aizawl khawpuia Traffic Duty-te ai chuan an inthlahdah zawk fe awm e tih tur a ni. Nimahsela Delhi-ah chuan Traffic duty-te hi lo inthlahdah deuh pawh nise lirthei khalhtute tana dan zawm loh chu hlauhawm tak a ni thoin a khat tawkin kawngsir remchang laiah Traffic Police thenkhatte hi rang taka tlanchhuah inpeih sa apin an lo awm reng thung.
Aizawl khawpui hrehawmna ber chu Traffic Jam hi a ni tia mi tam takin an lo sawi thin hi Delhi khawpuiah chuan a ni hauh lo a, Traffic Jam avanga minute nga aia rei lirthei tlan lai chawl hi a awm meuhin a rinawm loh. Hei hian System tha tak an neih zia a lan tir a, chu chuan mitin tan harsatna siam loin hahdamna a thlen zawk zia a takin an hria a, mitin chuan dan leh dunte chu thuawi takin an zawm mai niin a lang a. Lirthei maktaduai tam tak awm mahsela intlanchhawk ngai loa hetia Delhi khawpuia lirthei nitin a tlan reng thei tho hi kan Aizawl khawpuiah hian ti ve dawn ila chuan kan dan leh dun kengkawhtute hi an huaisen a ngai berin a rinawm. An dan leh dun chu lirthei changkang leh nalh tak tak mai bak a, Designation Plate lian tak tak tarte atanga Auto Rickshow khalhtute leh Sakawr tawlailir khalhtute thleng chuan an zawm vek a, Dan zawm loh chu a zahthlak tlat zawk. Kristian ram pawh ni lo, Hindu sakhaw tamna hmunah pawh hetiang taka thu an awih thei a nih chuan Kristian ramah chuan awih zawk awm tak a ni dawn lawm ni?
Mipui phurtu lirthei (Public Carrier) te reng reng hian dan an zawm thain dik thlapin pawisa pawh an la thin. Anmahni hmangtute chu mikhual leh chinchang hre lo pawh nisela bum an tum lo viau. Delhi khawpuia kan cham ve chhungah khan Auto Rickshow sawm aia tam kan hmang hman ang a, chung zingah chuan pakhat mah min bum tum kan tawng lo. Rickshow khalhtute hian Google Map an hman tangkai bawk avangin kawngbo leh tlansual a awm ngai lo bawk a, rate lamah pawh Uber atangin bituk sa a awm vek bawk avangin an mi phurhte tan phurrit an siam ngai hek lo. Pawisa nawi lamah erawh inngaihdam a awm lo viau a, cheng thum leh cheng sarih pawh nam liam mai loin dik thlap thlapin an kir zel tho.
Khawvel hmasawn rualin Rickshow pute ngei pawhin hmasawnna rahbi an rap ve zel a, hmel ena ziak leh chhiar pawh thiam hmel loh tak tur leh kum upa tak hmelte ngei pawhin Google Map hmangin an kalna tur an en zat zat thei mai hi a tulnain a nawrthluk vangah puh mai ngawt chi a ni lo ang. Hmanrua a nih ang ngeiin a hmanna tur takah an hmang a, tangkai takin an hmang mai a ni zawk. Tin, ka beisei aiin Auto fare rate hi a tlawm ziah lehnghal a, 20 Kms chuangah pawh Rs. 300 emaw chauh min chawi tirte kha mak ka ti zawk hial a ni. Hei hi a chhan ni a ka rin chu an kawngpui that bik vang a ni ngei ang a, chumi bakah chuan an duham lo tihna a ni ang. Ni e, an kawngpui chu a tha bik ngei a, keini angin biboh a awm ve lo a, kawngpui zawng zawng hi a mam em em vek mai a, chuvangin lirthei tan pawh chak tak taka tlan a awlin traffic Jam engmah a awm bawk si loh avangin a rate a tlawm ni tur a ni.
Keini lama tih ang loh deuhin eng lirthei pawh hi a rate sawi fel hmasak vek a niin pek dawnah an indawn ve ngai lo a, chutiang chu thil tha tak pawh a ni awm e. Kristian rama chengte tih awm tak tak hi anni Milem be zawk kan tih mai Hindu ho ramah hetiang tak maia hmuh tur a tam zawk hi chunglam malsawmna pawh an dawn phah ngeiin a rinawm a, rual awh a na thin hle a ni. Thil tam tak pawh nilo, thil tlemte her rem hret emaw tihdanglam hret hi nei ila chuan kan Aizawl khawpui chhungah ngei pawh hian heti takin lirthei tlan danah buaina leh harsatna a awm lo mai ang a, traffic Jam ngei pawh hi a awm lo thei mai hian a rinawm. Aizawl khawpuia lirthei khalhtute’n harsatna an tawh ang bawk hi Lunglei khawpui leh khawpui dangte pawh hian an hmabak chu a ni mai zel bawk si nen hian huaisen taka hma la ngam awm sela kawngro a su ngeiin a rinawm bawk a ni.