Nakkuma F1 season hawngtu tur Australian Grand Prix

Australian Grand Prix chuan kalphung nghet taka a lo neih tawh season thara intlansiak hmasaber changtu a nihna chu Arab khawvel lak atangin a hloh zet a, kum 2025 atangin he a nihna pangngai hi a neilet leh tawh dawn a, season thara race hmasaber a chang leh dawn.
Kum thar March ni 14-16 chhunga season hawnna race an nghah lehna tur Melbourne hian kum 1996-a F1 race a dawl tan atang khan kumtin race hmasaber a chang chho char char a, hripui len lai kum 2019 khan Melbourne tlankawng chu an khar a, Bahrain lamah season hawnna race an nghat chho ta a ni.
Muslim thla thianghlim Ramadan avangin kum 2025-a Bahrain leh Saudi Arabia race hi an tikhawtlai dawn a, hei vang hian race hmasaber an tlan thinnna Melbourne lamah kum 2032 thleng season hawnna race hmachhawn turin driver rual an pungkhawm leh dawn ta a ni.
Melbourne dawtah hian Asia lamah F1 team an insawn ang a, China leh Japan-a an tlan zawhin Middle East-in race pahnih a mikhual zui ve leh ang.
Kumin hian intlansiak vawi 24 a awm dawn a, chu chu Formula One world championship season khat chhunga race tam ber record niin, kum 2025 calendar tihchhuah takah pawh race 24 tho a awm leh ang.
Silverstone tlankawnga British Grand Prix chu nakkum July ni 4-6 chhung atan dah niin, December ni 5-7, 2025-ah Abu Dhabi race hmangin season an khar dawn a ni.
F1 chairman leh chief executive officer ni bawk Stefano Domenicali chuan kum 2025 hi FIA Formula 1 World Championship kum 75-na tur a nih avangin an tan special year a nih thu a sawi.