Nakkumah Olympic chief Bach chawl ve tawh dawn

Nakkumah Olympic chief Bach chawl ve tawh dawn
Olympic fencing champion hlui leh International Olympic Committee (IOC) president ni bawk Thomas Bach chuan nakkuma a term hnihna a hman zawhah IOC president chuh chhunzawm tawh loa chawlh ve tawh a tum thu a puang.
German ukil hian kum 2013 atangin he hna langsar hi a chelh tan a, Paris Games IOC inhmuhkhawm tumin member-te hmaah a hna vawn lai chu chelh chhunzawm thei tura dan dinglai siamrem tumna a awm a nih pawhin chawlh ve tawh a tum thu a sawichhuak.
Tuna dan dinglai (Olympic charter) ang chuan IOC president post hiu a rei berah mi pakhatah kum 12 chhung bak thawh theih a ni lo a, mahse, 2025-a a term kal lai a zawh huna kum 12 IOC president hna chelh tling tawh tur Bach hi a la president chhunzawm theihna’n ruahmanna an siam rinna a piang a, mahse, amah chuan hruaitu tharte hruai hun a nih ve tawh thu a tarlang.
Hnuk ulh teuha thu a sawiah Bach chuan, “IOC president hna kum 12 ka thawh tlin hnu chuan hruaitu hna inthlak ve tawh hi pawl tana tha tur a ni a, hun thar lo herchhuak tur chuan hruaitu tharte pawh a lenchhuak tur a ni,” a ti.
Bach-a sawi zel danin, IOC president thar thlan hun chu March 2025 niin, president thar chuan June thla atangin office a luah tan ang.
Hmanlai Olympia hmuna IOC session-ah president thar hi thlan a ni dawn a, tun dinhmunah president chuh tuma vantlang hriata campaign kalpui thawm hi hriat tur an la awm lo a, Bach bawk hi an ngaichang leh thup niin a lang a, he boruakah hian German pachal a tawngchhuak ta a ni.
Kum 1976-a Olympic fencing champion lo ni tawh Bach hian kum 1991 khan Olympic body hi member fang niin a zawm a, chu mi atanga kum 11 hnuah Jacques Rogge thlakin IOC a hruai chhunzawm ta ngat ngat a ni.