Naktukah vawikhat hmeh zeuh…

Ram hruaitu tur thlan hun, vote thlak ni chu ‘naktuk’ mai khi a lo ni leh ta reng mai. Naktuk November ni 7 hi Mizoram tan ni pawimawh tak a ni. Mipuiin kum nga chhunga kan aiawha roreltu tur, ram leh hnam hmasawnna hna thawktu tur kan thlang dawn a ni a, EVM i hmeh zeuh chhung kha second khat lek a ni ang a, i vawikhat hmeh khan kum nga chhunga i dunhmun tur, ram leh hnam hmasawnna dinhmun tur a hril dawn a, chumi hun chu ‘Naktuk’ mai khi a lo ni leh ta reng mai. Ngunthluk taka ngaihtuahna sen a pawimawh dawn hle.
Democracy ramah chuan mipui thiltihtheihna ‘power’ hian a daih rei thin khawp mai a, second khat chhung i hmeh zeuh khan kum 5 chhung a daih a, kum 5 a lo her chhuah leh hma chuan hmeh nawn leha tih danglam theih a ni tawh ngai lo. Kan aiawha ram roreltu tur kan thlang kan tih hian, kan chunga roreltu tur kan thlang tihna a ni; namnul mai chi a ni lo. Kan thlan fuh loh chuan kum nga chhung a fuh lo reng tawh mai dawn a, power hmang sual lo tura uluk hle a pawimawh dawn.
Vote thlak hrim hrim hi khua leh tui thate duty leh mawhphurhna a ni a, vote nei chin chuan vote thlak ngei tur a ni. Hetih rual hian vote tlak that leh that loh hian awmzia thui tak a nei a. Vote thlak i ngaih pawimawh loh avang khan i duh lohzawng deuh khan a tlin phah khut thei. Vote thlak i ngaih pawimawh laiin ngai pawimawh lo mi thenkhat avangin mi tha lo deuh a tlin phah thei bawk. Chumi awmzia chu, vote a tlak that loh avangin mi tha a tlak phah thei a, mi tha lo a tlin pah thei a; tichuan vote thlakah thahnemngaih a ngai tihna a nih chu. Vote thlak kan ngaihpawimawh a, rilru leh tihtakzeta ngaihtuahna seng chunga mi tinin vote kan thlak phawt chuan, chu chu Chunglam tan pawh malsawm a chakawm ngeiin a rinawm.
Vote thlak ngei turin inbuatsaih tlang ila, vote thlak chhan ngun takin ngaihtuah bawk ila. Vote nei thei tura kum 18 chhung nghah ngar ngar a ngaih laia, vote thlak tura nikhat lek tha kan pe thei leh si lo a nih chuan, mahni inngaihlut nachang hre lo tak kan ni tihna a ni ngei ang.
Naktukah vote i thlak theuh ang u; vawikhat hmeh zeuh a ni mai.