Naples khawpuiin Maradona piancham an lawm leh mup mup!

Naples khawpuiin Maradona piancham an lawm leh mup mup!
La dam se kum 65 tling tawh tur football legend Diego Maradona piancham tunhnaia lo herchhuak leh ta chu Europe club lian leh ropui tak tak kalkana a vawn chat SSC Napoli khaw behchhan Naples khawpui chuan uar takin a lawm leh ta a, a lim chu motor-ah phurin tuallai an fanpui.
Maradona lim (bronze statue) hi khawpui chhungah chhum lo chat loin darkar 24 chhung an tlankualpui a; milim Kertu (sculptor) hi Domenico Sepe niin, Vignati Collection Museum-a an dah a ni a; a piancham a lo herchhuah hian museum atangin an phur chhuak a, Spanish Quarters an tih atanga bul tanin Napoli khelmual leh amah, Argentine great ngei pawh a lo tualchai tawh thinna Stadio Diego Armando Maradona-ah an tawp.
He kawng zawh hi Maradona Museum huaihawta kalpui niin, Napoli fans leh Naples khaw mipui (Neapolitans) thinlungah a la nung reng a, an hmangaihna leh hriatrengna pawh a la pangngai reng a ni tih lantirna tura heti hawi zawnga piancham lawman hi kalpui an ni.
Neapolitans tan chuan Maradona hi football icon a ni satliah mai lo a, chhandamtu, an inchhuan kumkhuana, an inpumkhatna thlentu bulpui, an hlutna tehna a ni!
Diego Maradona: The God of Naples
Naples khawpuiah chuan pathiana Diego Maradona betu n awm thu leh Maradona kohhran hial a din thu kan hre thin a, hminglemah ‘God of Naples’ vuah tawk an awm a, ‘The living God’ tih a hlawh bawk!
Barcelona tan kum 1982-1984 chhung game 36-a goal 22 a thun hnuah rin loh takin Italy lam a hawi a, kum 1984 July ni 5 khan Napoli player ni tura lawmluh niin, Stadio San Paolo-a mipui 75,000 zet pungkhawm hmaa lawmluh programme kha khawvel media zawng zawngin an tinzawn a ni ber.
Kum 1984-1991 inkar Napoli tana a khelh chhung khan 1986-87 season-ah Napoli chanchina a vawi khatna atan Maradona hoin Serie A Championship title an hlawhchhuak a, he Scudetto-winning season tawp lamah hian ‘Lal tawngtaina’ kan tih ‘Lord’s Prayer’ chu Neapolitan-te chuan an thlak ta mai a, ‘Kan Pa, vana mi…’ tih aiah “Our Maradona, Who Takes the Field, We have hallowed thy name, Thy Kingdom is Napoli, Lead us not into disappointment, But deliver unto us the title, Amen.” tiin tawngtaina thu an phuah thar a, Maradona pathiana biakna a intan nghal der!
Mizo tawng chuan: ‘Kan Maradona, khelmual min hruai thlengtu, i hming hi kan zah a ni. Min tilunghnur suh la, chu aia chuan title min lakpui zel ang che, Amen’ tihna a ni ber awm e!
Italian top flight title a han lakpui hnu phei kha chuan a ke nghahnaah tawh phawt chuan fans-in an bawr hut hut a ni ber a; a damlai khan chumi boruak chu sawichhuakin, “Ka awmnaah tawh phawt chuan thawm a so bulh bulh a, han bazar ve lawk pawh a theih loh a, cinema tura chhuah leh theatre-a han teiluh ve pawh a rem lo,” a ti!
Naples khawpuia a khawsak lai leh a hnu kum engngemawti chhung khan Neapolitan in tinah chuan Maradona thlalak intar hmuh tur a awm vek a ni ber a; Napoli jersey number 10 a hak laia Naplews khawpuia mipa naupang piang sang tam tak chu ‘Maradona’ hming sak hnan an ni!
Neapolitan nute fa tawh phawt kha chu Maradona an ni ta vek emaw tih tur a ni a, Neapolitan nulate bialpa zawng zawng pawh kha Maradona an ni zo ta vek emaw tihtur niin, Napoli-in UEFA Cup an lak tuma journalist pakhatin champion lawm Naples khaw nula pathum a kawm tum pawhin ‘tu bulah nge zan tumtawi an chak ber tih zawhna chu “Maradona, Maradona!” tia rak chul chungin an chhang!
Khatih hun lai ngat kha chuan official pawh ni lo, licence pawh nei loa Maradona behchhana sumdawnna (merchandise) kalpui tawh phawt kha chu miin an bawr hut hut a ni ber a, Argentine nena inzawmna nei jersey, a thlalak leh eng thuam mai pawh kha hralh a kal em em vek ringawt mai a ni.
Naples khua atanga Maradona kalbo atanga kum 20 hnuah meuh pawh Maradona behchhana sumdawnna chu a la tlachhe tak tak thei lo a; amah leh a chhungkua chu pathiana bia tun thlengin an la kat nuk mai!
A fanu pawh…
Maradona fanu Dalma-i khan a pa contract zawh hnuin Naples khua kha kum hnih mi lek a nih lain a chhuahsan a, a hnua a fanuin a pa nghawng lenna khawpui a tlawh leh boruak sawiin Napoli legend chuan, “Kum 2011 khan ka fanu Dalma chu Naples tlawh tura nawrluih a ni a,” tiin pathian biaka an lo biak dan a sawizawm a, “Neapolitan mipuiin khuaa an han hmu chu kawtthlerah khan ka fanu tan kal ngaihna a awm lo. A hmaah khan mite kha an thingthi dual dual a,” a ti.
“A ni khatnaah chuan ‘sight-seeing’ an han neihpui ve bawk a, in pakhat bulah hian car an han tiding a, doorbell an han hmet chiah chu kan thenawm khawveng hlui zawng zawng kha an lo tlankhawm a, an kuah a, an fawp a, thla an lakpui a.
“Damdawi inah an hruai leh a, kawngkapuiah doctor, technician, nurse leh dam lo zawng zawngin an lo hmuak a; Thawhlehni a ni a, a pual liau liauin stadium an hawng a, khelmual vengtu hmuh tura Dalma-i’n a passport a han lekking chiah chu kha pa kha a thi a ni thaw thang mai,” a ti!
Maradona lo lan hma kum 60 chhunga Coppa Italia title pahnih bak hawn zo lo kha Argentine puihna hnuaiah Scudetti pahnih, UEFA Cup pakhat leh Italian Cup pathumna an hlawhchhuak miau a, amah mai pawh ni lo, a chhungte thlenga ngaihsan an hlawhna khawpui chuan fapa rangkachak Diego Armando Maradona piancham hi an theihnghilh ngai dawn tawh lo niin a lang!