Napoli-a nun thar bul \an tur Kevin de Bruyne a phur tawh

Napoli-a nun thar bul tan tur
Kevin de Bruyne a phur tawh
Tarlan tawh angin, kum 2015 daih tawha German side VfL Wolfsburg chhuahsana Manchester City a zawm hnua Etihad club tana trophy 19 tehreng lakpui tling Kevin De Bruyne chuan kar liamta Ningani khan Premier League title paruk leh Champions League trophy pakhat a chawi tawhna English club chhuahsanin Italian Serie A champion Napoli chu free agent-in a zawm fel a, Naples khawpuiah nun bul a tan dawn a nih kha.
Contract a ziah fel hnuah Belgian hian medical examination hmachhawn turin Rome khawpui a thlawklut a; a hnua Calciomercato Napoli-in an kawmnaah De Bruyne chuan a club thar a zawm chhan sawiin, Napoli nen tum thuhmun an nei tih a sawi a, Italian club hmachhawp chu amah nena inmil chiah nia sawiin, champion tura tha a thawh tur thu a sawi.
“England rama kum 10 kan khawsak hnua Italy kan pan tur hi kei leh ka chhungte tan tawnhriat thar a ni dawn a, kan phur tawh hle a, insawn thuai thuai hlan kan nghakhlel tawh takzet a ni.
“Hnehtu ka ni ve a, club tharah pawh hnehtu nih chhunzawm zel hi ka duh a, game-a tlawm haw chi ka ni.
“Napoli hi championship title la hlimhlawt chunga Champions League-a kirleh an ni a, thawkho chungin thil ropui kan thawkchhuak dawn a ni,” a ti.
Belgian playmaker De Bruyne hi kum 10 zet City thuam a inbel chhung khan Premier League Player of the Season-ah tum hnih an thlang hman a; Premier League history-a midfielder ropui berte zinga pakhat ni mah se tun season tawp rual khan City-a a contract ziah hnuhnungber a tawp fel ve ta a, kum 33 mi ni chungin Italian top flight team a la zawm zui leh ta tho a ni.
Napoli chuan social media platform X-ah an midfielder lei thar chungchang tarchhuak zui nghalin, “Kan zinga a lo tel ve ta hi Kevin pawh a inchhuang hle a ni,” tiin.
He Belgium captain hian season liamta mai khan City tan inelna hrang hrangah belhkhawmin match 40 a khel tling a, tah chuan goal ruk khungin, assist vawi riat a nei tling a, City chu season thar Champions League khel tura tlinpuiin, nikum September thlaa malpui hliam avanga a chawlh hnu khan pangngai takin khelmualah a kir leh thei a ni.
, Season hnuhnung liamta pahnihah khan hliamin a tibuai fo a, chuvangin City tan pawh a inlan tam theih loh phah a ni.
Inelna hrang hrangah belhkhawmin De Bruyne hian Manchester khaw club tan game 422 khelin goal 108 a thun bakah assist ngawt pawh tum 177 a nei tling a, Premier League bika assist vawi 119 a siam tlin hmangin he league history-a assist ngah ber Ryan Giggs (162)-a dawttu a ni pha.
A club thar Napoli hian inelna chep tak karah Inter Milan hmakhalhin tunhnai kum thum chhunga a vawihnihna atan Serie A title an hlawhchhuak hlimhlawt a, season tharah midfield lama tawnhriat ngah tawh De Bruyne an chhawr zui thei dawn a ni.
Veteran star player-te hiptu chak tak pakhat Major League Soccer lam nen pawh Belgian hi sawizawm a ni hman thuak thuak a, mahse, MLS club Chicago Fire chuan an chang ta lo a, Chelsea leh Tottenham manager hlui Antonio Conte chuan Italian champion team-ah a hruailut ta zawk a ni.
De Bruyne hian City tana Premier League title paruk a lak tlin bakah League Cup panga leh FA Cup pahnih a lakpui tel bawk a; tarlan tawh angin, kum 2023 khan Manchester City club chanchina a vawikhatna’n Champions League title a lakpui a, kha mi kum khan Treble champion a nihpui a, Pep Guardiola team kha English club zinga Treble thei team pahnihna chiah an ni nghe nghe.
City hian De Bruyne kalsan hmunruak luahtu atan midfielder pahnih an senglut fel tawh a; pakhat zawk chu AC Milan atanga an lei Tijjani Reijnders niin, Lyon atangin Rayan Cherki an lalut tawh bawk.
Englush club hian season thar Champions League-ah an player kalbo ta hmachhawn theihna ‘chance’ an nei mek a ni.
Belgium international an lakluh hmain Naples khaw team hian Premier League midfielder pahnih Scott McTominay leh Billy Gilmour-te an lo hruailut tawh bawk a ni.