National Games 2025-ah Mizo infiammi 80 chuang inlan dawn

National Games 2025-ah
Mizo infiammi 80 chuang inlan dawn
India rama infiamna inkhawmpui lian ber 38th National Games 2025 chu January ni 28 atanga February ni 14 chhung khian Uttrakhand-ah nghah a ni dawn a, he huna Mizoram aiawha tel tur sports association hrang hranga coach-te chu Mizoram Olympic Association chuan karliamta kartawp khan Sports & Youth Services Conference Hall-ah a kokhawm a, National Games inbuatsaihna hrang hrang sawiho a ni.
He hunah hian Mizoram Olympic Association Secretary General V. Lalzawmliana chuan thu a sawi a, Mizoram aiawha infiammi fehchhuak turte chu Mizoram tan theihtawp chhuaha inelna hmachhawn turin a fuih a, infiammi chuan medal tam tak la mah se mahni inthunun theihna (discipline) a neih that loh chuan awmzia a awm lo tih sawiin, Mizoram tan zahawm taka infiamna hmachhawna theihtawp chhuah chunga medal la ngei turin a ngen nghal bawk.
National Games 2025, Uttrakhand thlen turah hian Dehradun khawpuiah infiamna tam zawk chu nghah a ni dawn a; infiamna hrang hrang 34 hmanga inelna awm turah Mizoram atangin Sports discipline 14 chu National Games khel turin an tling a, infiammi 81 an tel thei tura ngaih a ni.
National Games 2025-a tel thei tur sports association hrang hrangte hian inbuatsaihna ngawrh takin an kalpui mek a; Mizo infiam mi langsar zingah Lalremsiami (hockey player) chu Mizoram atanga tel thei tur langsar zingah a tel.
Nazareth Lathazuala (Wushu), Taekwondo poomse mipa team leh Lalthlamuanpuia, weightlifting-ah Lalchhanhimite chu medal hlawhchhuak thei tur zingah beisei an ni.
Mizoram atanga National Games tel thei tur sports discipline-te chu – Wrestling, Football, Weightlifting, Wushu, Boxing, Cycling, Aquatic, Hockey, Judo, Archery leh Taekwondo-te an ni a; wildcard hmanga tel thei turte chu – Swiming, Shooting leh Athletics-te an ni.
Kum 2025 National Games hi Mizoram atanga National Games tling thei kan tam ber tum a ni.