National Herald sum thubuaiah Gandhi nufa hming lang

National Herald sum thubuaiah Gandhi nufa hming lang
Enforcement Directorate (ED) chuan National Herald sum tihchingpen a chhuina chargesheet chu Thawhlehni khan thehlutin Congress MP leh hruaitu hlun, Sonia Gandhi leh Rahul Gandhi bakah an party overseas unit chim Sam Pitroda hming a tel a. Special court-ah April 25 hian ngaihtuah tan a ni ang.
“The present prosecution complaint shall next be taken up for consideration, on the aspect of cognisance… when Special Counsel for the ED and the Investigating Officer shall also ensure production of the case diaries for perusal by the court,” special judge Vishal Gogne said.
Tun hi chargesheet-a Gandhi nufa an hming a lan vawi khatna a ni.
Gandhi-te hian engmah an la sawi lo va, Congress hruaitu, Adhir Ranjan Chowdhury-a erawh chuan Prime Minister Narendra Modi-a’n a ‘phiarna’ a nih thu leh agency chet dan chu a dem thu a sawi.
“Hei thil hi Prime Minister Modi-a’n Congress tihchhiat tuma a phiarna a ni a… ED hi i duh i tihtir thei a, keini chuan engah mah kan ngai lo. BJP leh Modi hi kan hlau lo… kan bei zel dawn,” a ti.
Inrinni khan ED hian bungraw khawih chet theih loh Rs vaibelchhe 661 hu chungchangah hriattirna a chhuah a. Hengte hi Congress-in a thunun Associated Journals Limited (AJL)-a pawisa tihchingpen nia sawi a chhuina kaihhnawih zelah a ni.
Hriattirna a chhuahah hian Delhi, Mumbai-a Bandra leh Bisheshwar Nath Road, Lucknow-a AJL building tiruak tura tihna a ni a. Heng zingah hian Delhi-a Bahadur Shah Zafar Marg-a National Herald House pawh a tel.
ED hian he thil hi kum 2021 atanga a chhui tan kha a ni a. June, 2014 khan Delhi-a Patiala House court chuan mi mal, BJP hruaitu pakhat, Subramanian Swamy-a’n thubuai a thehluh a ngaihtuah hnuah chhui tur hian a ti a ni.
Swamy-a hian Gandhi nufa leh mi dangte leh company pakhat, Young Indian Pvt Ltd, chuan dik lo takin Rs. Vaibelchhe 2,000 chuang man hu AJL thil chu dan pelin an nei niin a puh a ni.
National Herald hi Young Indian ta, AJL-in an tihchhuah thin chanchinbu a ni a. Gandhi nufa hian Young India-ah hian 38% ve ve neitu nihna an nei a ni.
Sum chingpen thubuai chargesheet thehluha Gandhi nufa hming a lan mek lai hian a hma lawkin ED chuan an makpa, Congress MP Priyanka Gandhi Vadra-i pasal, sumdanwg Robert Vadra chu Haryana-a real estate inremna chungchangah ED hian thu an zawt fiah bawk.
Vadra-a hi thu zawh fiah tura an kohna hmun a kalnaah hian Congress mi tam takin tawiawmin ‘Modi-a hian a hlauh apiangin ED a ko chhuak thin’ tiin an au rual a, an puhna chu ‘politics-a phuba lakna’ tiin an sawi a. Darkar tam tak thu zawh fiah niin an sawi bawk.
Congress leh eptu party dang tam tekte chuan prime minister hian a elpuite nawr tawm nan leh beih nan sorkar laipui hnuaia agency-te hi a hmang thin niin an lo puh tawh thin a. A bikin inthlan a hnaihah a hmang uar zual niin an sawi.
Vadra-a thu zawh a nih chhan hi kum 2008-a a company, Skylight Hospitality-in Rs Vaibelchhe 7.5-a Haryana-a ram an lei chungchangah a ni a. A hnuah housing society dil phalna hmuin ram man pawh a sang nghal vak a. Hemi hnuah hian real estate developer DLF hnenah Rs Vaibelchhe 58-in a hralh leh a ni.
Hetih hun lai hi Haryana-a Congress-in ro an rel lai a ni a, an party leh chief minister thin, Bhupinder Hooda te chuan engmah tih dik loh an neih loh thu an sawi thung.