Nations League final khel tura Portugal chakpuitu Ronaldo

Nations League final khel tura
Portugal chakpuitu Ronaldo
Germany ram Munich khawpuia an khelmual hmingthang Allianz Arena-ah Nations League semi-final khelin Portugal-in Germany an luhkhung a, captain Cristiano Ronaldo chuan 2-1-a mikhual chakna goal khungin, a vawihnihna’n an ram chu Nations League final a luhpui.
Tun kha kum 2000 hnu lama Portugal-in Germany an hneh leh vawikhatna a ni a; kum 2019 khan Nations League khelh tan kumah final lut tawhin, champion hmasaber an ni nghe nghe.
Kum 40 mi ni tawh Ronaldo tan Nilaini match kha ram tana game 220 a khelhna leh international goal 137 a thunna niin, a career-ah belhkhawmin goal 937 a khawl tling ta chiah bawk a, he’ng number pathum kan han tarlante hi men’s record a ni fai vek bawk!
Nizan semi-final lehlamah Spain leh France intumin, result tarlan hman a ni lo a, a chak zawk zawk hian naktuk zan final-ah Portugal an hmachhawn dawn a ni.
Allianz Arena inkhelah kirleh ila.
Mualneitu Germany lamin first half thunun zawk mah se Portugal keeper Diogo Costa chetthat vang liau liauin goal a lut lo.
He shotstopper hian first half-ah lei hrul thuaka Germany player Leon Goretzka ball thawnluh chu pui zetin a dansak a; a hnu, minute hnih lek a kal leh tihah Costa bawk hian Portugal chhanchhuak nawn lehin, hnai set sawt atanga Nick Woltemade-a goal tur chu pui takin a dangchat a; Goretzka goal tur a dang zui leh chiah bawk.
Second half tir lamah erawh mikhual team hian German palian rual an dang zo ta ngang lo a, minute 48-ah vengtu nei lo Florian Wirtz chuan box chhung atangin Joshua Kimmich-a ball pek chu goal-ah a khung.
Portugal erletin match kalphung an sawidanglam ta dawrh a; around, substitute Francisco Conceicao chuan minute 63-ah an si phurh sutin, minute li a liam chiah tihah Ronaldo chuan Nuno Mendes-a ball chhawpsak hmangin chakna goal hlu bik a khung zui ta a ni.
Conceicao tan khat match-a a goal khung leh hnehna an sualchhuah kha a hlu zual bik niin a lang a, a chhan pawh Nilaini zan hma lama Portugal-in Germany an hneh hnuhnun ber tum kum 2000 European Championship-ah khan a pa Sergio chuan Germany lamah hat-trick a siam a, kha mi hnua Portuguese hoin German-ho an hneh leh vawikhatnaah a pa hnung zui zo chiah lo mah se an si phurh sutna goal khungtu a ni.
Germany lam khan substitute Karim Adeyemi an luhtir hnuah beiseina thar an han nei dawn uk uk a, mahse, an ke thar pawh hian home team tlawm tur a chhanchhuak zo lo a, a hun tha hmuh chu Costa ding lam goal ban a fuh.
Portugal khan hun tawp dawn tepah goal khat dang an hlawhchhuak zui leh teuh hle a, mahse, Germany keeper Marc-Andre ter Stegen a chesual nawn duh ta bik lo a, a ‘double save’ hmangin chiang lehzuala Portugal chak tur a dangbet.
Goal sarih ngah tawh Cristiano Ronaldo kha 2024-25 Nations League-a goal khung hnem ber dawttu pakhat zawk (joint-second top scorer) niin, ram tana khel hnem ber, international goal khung hnem ber leh football-a goal thun hnem ber mipa zingah ni mah se Germany lakah Ronaldo hian record a nei chhe hle a, tunhma lama international level-a Germany a hmachhawn tawh vawi ngaah an ram a tlawmpui fai vek a, tun kha Germany hnehtu team zinga a tel vawikhatna niin, German-ho laka a record thar chu vawi ruk khelha vawi khat chak niin, heti tak hian khawi ram dang lakah mah record chhia a nei lo!
Nations League final hi Stuttgart khawpuiah a han khel zet ang a, a hnu lamah chuan club lama a hmalam hun tur Ronaldo hian a chingfel zui tura ngaih a ni.
Kum hnih leh a chanve liamta chhung khan Ronaldo hian Saudi club Al-Nassr tan khelin, kumin nipui thawt rual hian a contract neih lai a hmang zo ve tawh dawn a, Arab team hi a chhuahsan tura ngaih a ni.
Season game hnuhnung ber a khelh hma lawk khan social media lamah, “He bung leh chang hi a tawp fel ta. Kan thawnthu ber chu eng maw? Ziah mek a ni. Mi zawng zawng chung ka lawm e,” tiin thu a dah a, hei hian Al-Nassr a chhuahsan ve tawh ngei dawn nia ngaihna a siam.
Fifa president Gianni Infantino pawhin kumin nipui laia khelh tur Club World Cup-a Ronaldo inlan theih dan tur an ngaihtuah tih a lo sawi ve mek bawk a, hei pawh hian Arab team atanga Portugal captain chhuah lam a nger tun mai!
A awmzia chu Al-Nassr hi Club World Cup khel turin an tling lo phawt a, tournament-a an inlan dawn loh miau avangin he team behchhan hian Ronaldo chuan Fifa huaihawta club-te inelna hi a khel dawn lo a, mahse, Club World Cup khelh hma ngei hian Ronaldo chuan Al-Nassr chhuahsanin Club World Cup khel tur team zawm hman se he tournament a khelh theih dan tur ngaihtuah a ni dawn tih chu Fifa president sawi dan a ni!
Fifa hian player ropui bik Ronaldo hi an club tournament siamah hian tel ve se, Club World Cup tiropuitu leh tilartu ni se an duh vangin hriatthiamna bik a lakah lantir an tum a ni.
Tun dinhmunah Brazilian club Botafogo chu Ronaldo nena sawizawm pui ber a ni a, chutih laiin media hrang thenkhatin kum 42 a nih thlenga cham zui turin Al-Nassr lamin contract thar an zawrh dawn tih a an tarlang ve mek bawk.
Belhkhawma goal 937 khawl tling tawh Cristiano Ronaldo hian a career goal 1,000 thun tling turin goal 63 thun a la ngai a, chu chu a puitlin thei a nih chuan goal 1,000 thun tling thei hmasaber leh awmchhun a ni ang.
Brazil legend pahnih Pele leh Romario-te khan goal 1,000 chuang thun tling ve veah inchhal mah se an goal thunna tamtak kha unofficial match niin, friendly tihte a nih hlawm avangin official-a goal 1,000 thun tlinga chhiar an ni lo.
Season liamta khan kum 40 mi ni tawh chungin Ronaldo hian goal 35 a la tilut tling a, heti dana chhut chuan Al-Nassr lamah hian kum hnih dang cham leh ta se goal sangkhat hi chu a puitlin thei maiin a rinawm!