NATO chief tur Mark Rutte

Rutte ruatna hi NATO ambassador tena Brussels a meeting an neihnaah pawmfel a ni a. US President Joe Biden leh a thawhpuite chuan Washington-ah July 9-11 ah an mikhual nghal bawk ang.
Dutch premier ni lai mek Rutte hian secretary-general kalchhuak tur Norway mi Jens Stoltenberg chu October 1 atangin a thlak dawn a ni. Stoltenberg hian NATO secretary general hna kum sawm chuang a chelh a. A hun pawhsei sakin a awm deuh reng a ni.
“NATO chief a min thlak turin Mark Rutte ka lo lawm a ni” tiin Stoltenberg chuan a sawi a.
“Mark hi trans-Atanticist dik tak, leader chak leh midang te ngai pawimawh a ni. Vawiin leh naktuka harsatna kan tawh mek karah NATO tichak zel turin duhsakna ka hlan a ni. NATO chu mi tha tak kutah a awm dawn tih ka hria a ni” tiin a sawi.
NATO hi inrawnkhawmna consensus hmanga kal niin Secretary General chuan meeting kaihruai thinin member te nen inrawntlanna neih thin a ni.
Rutte a kal kawngah White House-in a thlawp chungin leh NATO ram lian dang Germany pawhin a thlawp chungin harsatna a tawk tho va, mahse, Romanian President Kalus Iohannis a inhnuhdawh tak hnuah chuhtu awm lovin a awm ta a ni.
Hungary leh Turkey in a tirah chuan an duh lo va, mahse, a hnuah an pawm ve leh bawk. NATO danah chuan member ram pakhat pawhin thutlukna siam turah an duhlohna an lantir chuan kalpui zui theih a ni lo.