Nato member 31 nan Finland la lut ta

Finland chu Nato security alliance member ram 31-na ni tain tihian member state leh Russia ramri chu a leta tihpun a ni ta a ni.
Finnish foreign minister chuan US secretary of state hnenah accession document hlanin Finland chu member ram atana puan a ni zui nghal a ni.
He mi hnu hian Nato headquarter tharah chuan Finland flag var leh pawl chu flag dang 30 te rualin a phe zui nghal vat vat a. Finland-in Nato a zawm hi Russia tan chuan chanchin lawmawm lo a ni thung.
Russian President Vladimir Putin chuan Ukraine a runna chhan bera chhuanlam a siam chu Nato inzar pharh zel danna tur leh a duh lohna tiin a lo sawi tawh a ni.
US Secretary of State Antony Blinken chuan a thenawm a run avangin Russian leader chuan a duh loh leh a dan tum ber a hmuh phah tiin a sawi.
Kremlin thupuangtu Dmitry Peskov chuan Russia chuan Finland a thil thleng chu uluk takin a thlithlai reng dawn tia sawiin Nato inla lian zel chu ‘kan ram leh himna atana pawi thei a ni’ tiin a sawi bawk.
Nato member atana lakluhnaah hian Finland national anthem chu tihrik niin chumi hnuah Nato hymn in a zui a. A bul lawkah Ukrainian flag vaiin mi tlemte te chuan ‘Nato ah Ukraine’ tiin an lo au ve thung a ni. Russia-in Ukraine a run avang hian tun hma atanga zawlbik nei ngai lo ram pahnih Finland leh Sweden te chuan May 2022 khan Nato zawm an dil a ni.
Finland hian khawchhak lamah Russia nen ramri 1,340-km laia thui neiin Ukraine indona thlen hnuah Helsinki chuan Nato’s Article Five hnuaia humhimna chu a duh a ni. Nato Article Five-ah chuan member ram tupawhin beih a tawh chuan Nato beihna anga ngaiha beihlet tur tih a ni.
Chumi awmzia chu Finland in beih a tawk a nih chuan Nato member te US pawh telin Finland chhan turin an pen chhuak dawn tihna a ni a. Russia-in Ukraine a run avangin Finnish public opinion lakah 80% chuangin an him nan Nato zawm an thlang a ni.
“Finland tana ni pawimawh a ni” tia sawiin Finnish President Sauli Niinisto chuan an ram tana bung thar tiin a sawi bawk a. Finland chu thain rinawm a nih tur thu leh member an nihna chu tute tan mah harsatna thlen lo tur a ti bawk a. “Security leh stability hi kan duh em em niin, mipuite him leh thlamuang taka an chen theihna chu nun hlimna atana thil pawimawh bulthut a ni,” tiin a sawi a.
“Nato zawm hian Finland him zawk leh Nato chak zawk a thlen dawn a ni” tiin Nato Secretary General Jens Stoltenberg chuan a sawi bawk a, Nato tana ni chhinchhiahtlak tiin a sawi bawk.
“President Putin chuan a ramri hnaiha Nato tlem zawk leh Europe member tlem zawk duhin Ukraine a run a, a beisei loh ang chiah zawk a thlen phah a ni,” tiin Stoltenberg chuan a sawi bawk.
US Secretary of State Antony Blinken chuan ‘Putin hnena lawmthu kan sawi theihna awm chhun tia sawi mai chakawm tia sawiin a chhan ber pawh Russia inlulinna dodal a tum ber chu a thleng dik ta zawk a ni’ tiin a sawi.
Finland hian sipai tha tak 30,000 vel a nei sa a, hei bakah hian reserves 250,000 vel koh mai theih a nei bawk. Nato a zawm tak avangin a ramri hmangin Russia chu chep zawka danin a awm theih phah dawn bawk.
Finland-in Nato a zawm tawh laiin a ruala dil ve tho Sweden erawh tihfel theih a la ni lo va, a chhan ber pawh Turkish President Recep Tayyip Erdogan an Stockholm chu Kurdish militant te khawia an kawtthlera lungawilohna lantir pawh remtiah a puh vang a ni ber a, hei bakah hian Hungary pawhin Sweden dilna chu a la pawmpui lo bawk. Nato member ni tur hian member tin ten remtihna an pek vek ngai a ni.
Hetih lai hian Stoltenberg chuan tuna pawimawh ber chu Sweden in Nato a zawm vat chu a nih thu sawi thungin July thlaa Lithuania a Nato summit neih leh hunah Sweden chu member ram a nih hmana beisei thu a sawi bawk.
Helsinki hian Nato zawm nan kum khat pawh hun a hmang lo va, Thawhlehnia Nato a zawm ni kha Nato dincham 74-na chiah niin kum 1949 ah Nato hi din a ni.
“Finland hi kan thawhpui ram tha tak leh theihna nei sang niin values intawm kan nei a ni,” tiin Nato a US ambassador Julianne Smith chuan a sawi bawk.
Kremlin chuan Russia chu loh theih lohin a security te him zawka a kalpui theih nana nawra a awm thu sawiin mahse Ukraine anti-Russian a nih tak ang lo takin Helsinki nena inbakkaihna engmah leh inhmuh thiamlohna an nei ve ngai lo a ti bawk.
Hetih lai hian Russia Defence Minister Sergei Shoigu chuan Russia chuan short-range Iskander-M ballistic missile system chu Belarus hnenah a pek thu sawiin he ralthuam hian nuclear bakah conventional weapons te a keng tel thei a, Belarusian fighter jet thenkhatte chuan nuclear weapon an keng tel thei a ti bawk.
Jens Stoltenberg chuan tun thlengin Nato chuan Russia chetlak dan avanga ruahmana thlak danglam ngai an la hmu lo a ti a. Nato sipaite pawh Finland sorkarin remtihna a pek loh chuan an ramah dahin an awm ngai dawn lo a ti bawk.
Tihian Nato chuan Baltic Sea chheh velah member ram pasarih a nei ta a, Russia chu dan chepin a awm zual zel tihna a ni bawk.