Nau chunga thihna sawrkarin chhui Mawhphurtu chungah hma lak tum

Tunhnaia Lungleia nau chunga thihna thlengah a mawhphurtu an chhui anga, action lak a ni dawn tih Health & Family Welfare minister Lalrinpuii chuan a sawi.
Health minister chuan he thil thleng hi March 13 – Chapchar Kut hman lai khan a hre ve chauh a, a hriat ve leh department hotulute bia in, directorate atangin preliminary enquiry la turin an intir nghal a. Enquiry latute hian nunna chan ta chhungte leh department official-te an hmu tih a sawi. Nunna chan ta chhungte hian police station-ah FIR an thehlut nia a hriat thu a sawi bawk.
Nunna a hlu em em a, a hma pawhin a thleng tawh a, heng thil hi ngawihbo pui mai chi a ni loa, khawng taka rel ngai niin an hria a, magisterial enquiry tih a ni dawn tih a sawi a ni.
“Ka bial chhungah nau chunga thihna a thleng hi pawi ka tiin ka rilru a na a, sawrkarin damdawi in awm lohna hmunah pawh nau chunga thihna ti tlem tura theihtawp chhuah a nih tawh lai a, District Hospital awmna, gynaecologist pawh pahnih an awmna hmunah raicheh kan chhanchhuak thei lo hi a rilru nat thlak hle a, a mawhphurtu chhuichhuaka action la turin hma kan la dawn,” Lalrinpuii hian a ti.