Naupang hnar te an luhlul duh

Zan mutnaa naupang hnar thin te chuan a hnar ve ngai lo te aiin an nungchang lamah enkawl an harsa a, an thinchhiain an luhlul duh bik niin mithiam ten an sawi.
Albert Einstein College of Medicine of Yeshiva University a mithiam te chuan naupang 11,000-ah kum 6 ruk chhung zirchianna an nei a, he zirchiannaa an hotu Karen Bonuck chuan, “Naupang zan mut chiang lo, hnar thin emaw, an kaa thaw thin emaw, muthilh hlana rei tak thaw loa awm thin (apnea) te hian nungchang lamah harsatna an nei duh bik a, chuvangin nu leh pate leh pediatrician te pawhin zana naupang muhil te thawk lak dan kan ngaipawimawh hle tur a ni,” a ti.
Sleep-disordered breathing (SDB) an ti a, chu chu zan mut hlana thawk dana harsatna neite tihna a ni. An hnar a, chu chu ka (mouth) a thawkin a zui a apnea an nei duh hle bawk. SDB chu naupang kum 2 leh kum 6 inkarah a lang nasa duh bik a, chu aia an upat deuh hnuah pawh a lang tho bawk. SDB thlentu langsar tak pakhat chu tonsil vung emaw adenoids te a ni duh hle.
Dr Bonuck chuan, “Naupang SDB nei te chu a nei ve lo te aiin kum 7 an tlinin nungchang lama harsatna 40-100% a neih heihna risk a sang zawk a ni,” a ti.
Mithiam te chuan SDB hian kawng chi hrang hrangin naupang nungchang hi a nghawng thei niin an sawi a, SDB vangin oxygen an hip lut thlem a prefrontal cortex-ah carbon dioxide level a lo sang thin, an mut a chiang lova, chua chuan cellular leh chemical system-ah inbalance a siam ta thin a ni. Chu chuan thluakah nghawng a nei a, thil ngaihtuah/ngaihthlak that theihna an hloh a, thil tihdan tur han ruahman vel an harsat bik a, an thinchhiain an luhlul duh bik niin an sawi.
Dr Bonuck chuan, “Kan fa ten SDB symptom an neih chuan otolaryngologist (ENT doctor) hnenah entir tur a ni,” a ti.
He zirchianna hi journal Padiatrics-ah tarlan a ni.