Naupang natna mak tak a leng, mi 17 in nunna chan tawh

Naupang natna mak tak a leng, mi 17 in nunna chan tawh
Rajasthan a Udaipur district chhung, tribal tamna Kotra area-ah ni 30 kalta chhung khan natna mak tak mai leng avangin naupang 17 in nunna a chan a, hei hian health official-te chu a tihrilhhai hle. Naupang natna vei te hi kum nga hnuai lam vek an ni a, an nat tan atanga ni engemaw zat chhung leh an thih hma hian khawsik leh khuh neiin, chu chu an natna lanchhuah dan ber a ni. Rajasthan health department chuan a chhan hi an chhui mek thu an sawi.
Tun hnaia thi hnuhnung ber chu Pathianni khan niin, naupang kum hnih mi chu hetiang natna avang hian a thi a. Amah nen hian thla khat chhungin hemi bial naupang hetiang natna nei thihpui chu 17 an awm tawh a ni. Naute thihna khua a an khawtlang hruaitu Nika Ram Garasiya chuan, ‘Naute kum hnih mi hian khawsik leh khuh a vei a, a natna lan chhuah tirh atanga ni hnih thum hnuah a boral a ni,’ a ti.
Health official-te chuan chhiatna thlenna hmunah hian investigation team an tirh tawh thu sawiin, Udaipur-a chief medical health officer Dr. Shankar Lal Bamaniya chuan department lam chuan uluk takin thil awmdan a enfiah tawh tih a sawi a, ‘Kan team-te hian he natna awm chhan hi an chhui mek a, report dik tak an siam ang a, naupang damlote enkawlna tur dik tak an pe thei tawh ang,’ a ti.
Naupang thihna tuar nasatu khuate hi Gujarat ramri bul hnaia awm an ni a, khaw mipuite hian district pawnah damdawi lama enkawlna pawh an zawng fo niin an sawi. Tunah hian health department chuan naupang thi ta ten enkawlna an dawn dan a enfiah zui mek a, tualchhung leh pawn lam healthcare provider-te inrawlhna pawh an enfiah mek bawk a ni.
Thuneitute chuan mipuite chu naupang hetiang natna nei an kawl chuan damdawiin lam panpui vat zel turin an ngen a, thihna dang a thlen tawh loh nan hma an lak nghal thuai thuai thu an sawi bawk.