Naupangte tan library kal thei

Naupangte tan library kal thei
Italy-a Basilicata ram bial chhunga cheng a ni a, zirtirtu chawl tawh a ni a; mahse, zirtir hna a la chawlhsan thei lo. Ni tin a lirthei ke thum nei nen a inkhalh chhuak a, lehkhabu a phur teuh va, khaw hrang hrang tlawh kualin naupangte tan library kal thei, ‘bibliomotocarro’ tia an sawi thin chu hawngin naupangte lehkhabu chhiar tur a chhawp hnaisak thin.
Hetianga ti thin hi Antonio La Cava a ni a, “Ka lehkhabute hi lirthei hmang hian naupang sang tam tak hnen a thleng tawh,” tiin a sawi a. “Naupangte kiangah ka nun zawng zawng hi ka hmang a, lehkha chhiar turin ka sawm thin a, tunah erawh chuan an hnenah chhiar tur ka chhawp ta a ni,” a ti bawk.
La Cava hian a library kal thei hi kum 14 zet a kalpui tawh a, Basilicata ram bial chhunga tlang leh ruam khawkrawk tak tak a suartluan a. A hmain kum 42 zet chu sikulah zirtir hna a thawk tawh thin bawk.
“Bibliomotocarro hi kum 1999-a din kha a ni a, hna ka thawh lai atang tawh khan hetiang tih duhna rilru hi hun rei tak ata ka lo nei tawh a ni,” a ti.
La Cava hi Ferrandina-a piang a ni a, Basilicata-a thingtlang kilkhawr ve tak a ni a, Matera atanga km 35-a hlan a ni a. Lehkhabu phurh kual nan hian kum 2003 khan Ape a lei a, lehkhabu 700 thleng a phur thei a, a thlen chin apiangah Ape atanga tlangauvin lehkha chhiar turin naupangte a sawm a ni.
A chang chuan hmun langsar tak taka kal changte, khelmual leh kawna inawn changte a nei a. Chawlhkar khatah lehkhabu 450 vel hawh chhuahtir ang zel a ni.
La Cava hian a chang chuan a tlawh kilkhawr thei khawp mai a, San Paolo Albanese khua phei chu primary sikul kai rual naupang 2 chiah an awm a; mahse, a tlawh loh phah bik chiang miah lo.