Naupiang thla kim lo nasa ber

Naupiang thla kim lo nasa ber
Nash Keen, Ankeny, Iowa a cheng chu July ni 5, 2025 khan kum khat a tling ta a, Guinness World Records-in khawvela naupiang tawh dam chhuak zinga thla kim lo nasa berah a puang. Nash Keen hi a nuin kar 21 chiah a pai hman a ni. Guinness World Records hian hetianga thla kim lo a nau piang record siam tur hi chuan kum khat an tlin hun an ngak phawt thin. Nuin nau an pai hun chhung hi kar 40 a ni thin a, a kar 37-na leh kar 42-na inkarah nau hi an piang deuh ber a, kar 37-na hmalama naupiang chu ‘thla kim lo’ an ti thin.
Randall leh Mollie te chuan an fa hmasa ber an chhiat a, kar 18 an pai hman tihah nau an chhiat a, a pahnihna tur an pai leh chu an lawm khawp mai. Mahse, an nau pai kar 20-na atangin harsatna an tawk ta a, an chhiat leh mai dawn emaw an ti hman tawh hial a ni. Chutah Mollie chuan a thiante hnen atangin University of Iowa Health Care Stead Family Children’s Hospital-ah hetianga thla kim lo nasa taka naupiang an enkawl thin dan te a hre ta a, chu damdawi in chu an pan ta a ni.
July ni 2, 2024-ah Mollie chu damdawi inah admit a ni a, chumi hnu lawkah a tuibawm a keh zui ta mai a, mahse, amah enkawltu doctor te chuan a nau vei hun an tihkhawtlai sak thei a, mahse, ni hnih hnuah Mollie chuan eng emaw dik lo a awm tih amah a inhrethiam mai a, high-risk obstetrician, Malinda Schaefer, MD, PhD enkawlna hnuaiah Nash chu a nu pum chhungah kar 21 chiah a awm hman tihin khawvel êng hmu turin a rawn piang ta a ni.
Nash hi a pian hlimah 10 ounce (gram 283.495) leka rit a ni a, a têt em avangin inenkawlna hmanrua te pawh a hman hleihtheih dawn lo emaw an tihial a, theih tawpin an enkawl zui nghal a, ni 189 chhung damdawi ina an awm hnuah, January 2025 khan Nash chu a nu leh pa ten an inah an haw pui thei ta chauh a ni.