Nawrh thlawp loa tlan tum an awm An service theihnan hma lak a ni ang – Home department

Lirtheia eizawngtu pawlin tuialhtheia chhiah tih san avanga lungawi loh lantira tlan loh an tum chu titlang lo turin Mizoram sawrkar chuan a ngen a. An ti tlang dawn a nih a, lirtheia eizawngtu zingah service tum an awm a nih chuan, an duh ngeia an service theih nan sawrkarin hma a la dawn tih a sawi.Home department thuchhuak chuan, tunhnaiah sawrkarin tuialhtheia chhiah tihsan avanga Mizoram Commercial Vehicle Union (MCVU) in lungawi lohna lantira nawrh huaihawt a tum chu Mizoram sawrkar chuan nuar lo turin a duh a, mipui tana harsatna thlentir lo turin a ngen tih a sawi.
Commercial vehicle pawl thenkhatin mipui tana harsatna thleng palh thei hriaa nawrh ve loh an rel chu sawrkar chuan lawmawm a tih thu a sawi a. Hei vang hian tluang taka an service ngei theihna turin sawrkar chuan hma a la dawn a; commercial vehicle zinga service duhte an duh anga an service theihna turin sawrkarin hma lak a tum tih a sawi a ni.
Chhiah tihsan chungchanga mipui nawlpuiin nghet taka ding tura sawrkar an ngennaah sawrkar chuan lawmthu a sawi tih sawiin, ‘Heng chhiah (cess) tlingkhawm hi mipui hnenah a kir leh vek dawn a, ram hmasawnna tura kawng hrang hranga hman tura duan lawk a ni. Heti chunga MCVU-in nawrh an kalpui tlang dawn a nih pawhin, mipuiin an tawrh lohna turin sawrkarin theihtawp a chhuah dawn a,ruahmanna pawh a siam lawk tawh a; mipui tana harsatna thleng zawnga hma la lo turin Mizoram sawrkar chuan pawl hrang hrang a ngen a ni,’ thuchhuah chuan a ti.
Hetihlai hian lirtheia eizawngtu pawl zingah MCVU hmalakna thlawp loa tlan tum an awm nia hriat a ni a. Heng zingah hian a pawl ang chuan All Mizoram Petroleum Dealers Association, Mizoram Taxi Association, All Mizoram Commercial Tipper Association leh Mizoram Indane Drivers Welfare chu hriat theih chinah service tlang tum an ni.
Aizawl Two Wheeler Taxi Association zingah tlan tum leh tum lo an awm nia sawi a ni a, Thawhtanni zan khan ATTA hian meeting neiin an thutlukna hriat hman a ni lo.