Nawrhin mipui nghawng nasa

Nawrhin mipui nghawng nasa
Dah nghet tura sorkar ngenin CSS hnuaia thawkte sit-in-demonstration neiin an nuar a, sorkar hnuaia thawk mi sing chuang nuar hian kawng hrang hrangin mipui a nghawng mek.
CSS (Centrally Sponsored Scheme) hnuaia mite hi All Mizoram CSS Employees Coordination Committee-ah an inthlung khawm a, dah ngheh phutin September ni 9-11 chhung khan a huhovin chawlh an lo la tawh. An sawi danin, chumi hnua sorkar an lehkha thehluh a bo a, dan lova lak tiin sorkar hruaitute’n an sawi bawk. Sorkar chu insawi anga awm lovah an puh a, chumi hnuah Mizoram hmun hrang hrangah lungawi lohna lantirin an thu ta a ni.
Thu dawn danin, Mizoram pumah sikul 500 vel chu lehkha zir mumal lovin an awm mek a, sikul khar a awm bakah khar loh, mahse lehkha zir thei si lote an awm. Zirna in bakah DEO office leh DPC office-ahte thawktu an indaih lo hle bawk.
Sikul-ah hian a ngheta thawkte chu sikul hawng tura tih an ni a, zirtirtu engemaw zat chu sikul dang, zirtirtu awm lohna sikul lo hawng tura tih an ni bawk. Sikul hi an hawng ngei a, mahse class lak ngaihna a awm chuan loh avangin khar ang tho an ni tih thu dawn a ni.
Primary atanga higher secondary thlengin zirtirtuah hian a nghet aiin CSS hnuaia thawk hi an tam zawk a, CSS hnuaia thawk hi 4000 vel nia hriat a ni.
Zirna lam tih lohah medical lam a nghawng nasa a, Mizoram hmun hrang hrangah UPHC, PHC leh sub centre engemaw zatin hna an thawk mumal lo. Medical lamah hian CSS hnuaia mi hi 3000 vel an awm tih thu dawn a ni.
Aizawl Civil Hospital-ah pawh CSS hnuaia mite an nawrh avangin thisen test an ti hlei thei lo a, laboratory test lam an ti mumal thei lo tih thu dawn a ni.
Department dangte pawh a nghawng a, UD&PA-ah in sak tanpuina sem hna a nghawng a, agriculture leh horticulture department te, social welfare department te a nghawng bakah CSS hnuaia thawk nuar mekah hian wildlife guard te pawh an tel.