Naxal-te IED tihpuahah police eng emaw zat inhliam

Naxal-te IED tihpuahah police eng emaw zat inhliam
Naxalite-ten Thawhtanni tuk khan Chhattisgarh-a Sukma district-ah IED an tipuak a, kea patrol-a kal police eng emaw zatin hliam an tuar tih tual chhung police-in an sawi.
PTI chuan police hotu lawk pakhat leh a thuihhruai eng emaw zat IED puak avang hian hliam an tuar niin a tar lang a, an zat chiah erawh hriat theih a la ni lo.
“Konta Division, Sukma district Additional Superintendent of Police (ASP) Akash Rao Giripunje chu Konta-Errabora kawngpui, Dondra bula IED puakah hliam a tuar,” tiin hotu lianin a sawi.
Officer hi Thawhlehnia CPI (Maoist)-in Bharat Bandh an huaihawt turah venhimna dinhmun leh heng lai vela thil dik lo a awm palh thei em tih thlithlaia kea patrol duty-a kal a ni.
“Hliam tuarte hi Konta Hospital-ah enkawl an ni a. An zingah hian Additional SP Akash Rao pawh telin a dinhmun pawh a tha vak lo. Mi dangte erawh dinhmun hlauhawma awm an awm lo va. Additional SP Akash Rao hi damdawi in lian zawka sawn dan tur dap mek a ni,” tiin hotu lianin a sawi chu PTI-in a tar lang.
Hetih lai hian Zirtawpni khan Naxal hruaitu lawk tak, a luman pawh Rs. nuai 45 chhiar lai chu national park huam chhung, Chhattisgarh-a Bijapur district-a venhim hna thawktute nen an inbeihnaah thah a ni.
Bijapur police hotute chuan Naxal hruaitu hi Bhaskar Rao-a a ni a, Mailarapu Adellu leh Mandugula Bhaskar Rao ti pawhin an ko thin tih a sawi.
Bastar Range Inspector General P Sundarraj-a chuan Rao-a ruang hi inkahna thlen hnuah hmuh a ni a, a bulah hian AK-47 rifle, puak thei dang leh ralthuam dang a awm bawk tih a sawi.
Rao-a hi CPI (Maoist) Telangana State Committee hnuaia Mancherial-Komarambheem (MKB) division secretary a ni a, Special Zonal Committee (SZC) member a ni bawk.
Adilabad district, Telangana-a Urumadla khuaa cheng niin a luman pawh Rs. nuai 45 a ni a, Rs. nuai 25 hi Chhattisgarh sorkarin a chhiar niin Telengana sorkarin Rs. nuai 20 a chhiar bawk tih IG chuan a sawi.