NBA dan tharah ‘star player’ awl mai mai thiang tawh dawn lo

On Sep 15, 2023 6 0

NBA dan tharah ‘star player’
awl mai mai thiang tawh dawn lo
Basketball rule thar an duanchhuahah NBA team-te chuan tun season-ah hian game khatah star player pakhat bak an chawlhtir a rem tawh dawn lo a, dan bawhchhiate chu US dollar maktaduai thleng chawitir theih an ni dawn!
Player Participation Policy (dan thar)-in star player a sawifiah danin season hnuhnung pa-thum zela All-NBA Team emaw NBA All-Star team emawa tel phate chu ‘star player’ tihin a huam ang.
NBA commissioner Adam Silver chuan an dan tharin a huam dan sawifiahin, hliam emaw hrisellohna dangin a tlakbuak emawte a nih loh chuan an league-a player hriselte chuan game an khel thin tur a nih thu a sawi.
NBA team-te hian thlathar October ni 24 atanga nakkum April ni 19 chhung hian egular-season game 82 an khel dawn a, team tinte chu game khata star player pakhat bak awltir lo turin hriattir an ni.
A vawikhatna atana chu dan thar bawh-chhetute chu US dollar 100,000 (£80,000) chawitir an ni ang a, an bawhchhiat vawihnih-naah chawi tur sang zual sauhin US dollar 250,000 (£200,000) hmanga hrem an ni dawn a, chumi hnu lama bawhchhe team chu US dollar maktaduai 1 (£800,000) chawitir theih an ni dawn!
He dan tharah hian team neitute chu home leh away game-a an star player-te chawlhtir dan tur pawh felfai taka kalpui tura hriattir an ni a, star player-te chu ram pum huap TV-a inkhel tihchhuah laiin hmuh theiha phochhuah thin tur an ni bawk.
Dam loh vang ni loa fit player an chawlhtir a nih pawhin an pawlte inkhel chu a hmunah an thlir ngei tur a ni a, fans hmuh turin an awm ngei tur a ni. Star player-te chu rei tak an awl tur a ni lo.
Tarlan tawh angin, he dan thar hian inhliam leh mimal harsatna a huam tel lo a, kum bithliah atanga chhuta game khelh zawn theih zat bituk awm leh career-a rimtawng dan bakah hliam neih tawh dan ena chawlh ngai tihte a huam lo ang.
NBA season tharah hian team tinte chuan ni 178 chhungin match 82 an khel tling dawn tih tarlan a ni tawh a, ni hnih dana match khel angin a chhut theih thuak ang.