NCC hmasawnna tur rel

National Cadet Corps (NCC) State Advisory Committee chu an chairman, Youth Services minister Lalnghinglova Hmar hoin September 20 khan an thukhawm a, Silchar Headquarters Group commander Brig. Kapil Sood pawh telin, Mizorama NCC hmasawn theih dan tur an sawiho.
Thutkhawmah hian 1 Mizo Bn. commandant Col SS Kalia chuan powerpoint presentation hmangin NCC chanchin tlangpui leh Mizorama NCC battalion dinhmun, hmalakna leh hmathlir an neih te a sawi a. Hemi hnu hian Aizawla NCC Group Hqrs din chungchang leh NCC hmasawnna tura hmalak dan tur sawi zui a ni.
Zirna in leh zirlai zingah zau zawka NCC chungchang zirtir dan ngaihtuah nise, an ti a. Zirna leh sawrkar hnaah NCC officer leh cadet-te tana hamthatna (incentive) awm theite sawi a ni. Sports & Youth Services department-a thawkte bakah sawrkar department dang – School Education, Higher & Technical Education leh Mizoram University nen thawhho dan ngaihtuah nise, an ti bawk.
NCC hi kum 1917-ah University Corps tia din tan a ni a, kum 1948-ah National Cadet Corps Act hnuaia NCC tia thlak a ni. Tunah hian khawvela ‘uniformed youth organisation’ lian ber a ni. Mizoram hi Silchar Group Hqrs hnuaiah awmin battalion pali – 1 Mizo Bn, 20 Mizo Bn, 1 Mizo Air Squadron leh 2 Bn Mizo a awm a ni.