NCC rally-a telte cham mek

long atanga tan tawh National Cadet Corps North Eastern Region (NER) Rally for Cadets-a telte chuan Nilaini tlai khan Aizawl an lut a, larsap Dr Hari Babu Kambhampati hoin NCC hotuten an lo hmuak.
NCC NER Rally for Cadets hi NCC Directorate North East Region-a addl DG Major Gen. Gagan Deep chuan a rawn hruai thleng a. Rally-ah hian NCC cadet leh an hruaitu Army officer-te lirthei 12-ah inzuiin, program nei lawk vekin hmun hrang hrangah thalaite nen hun an hmang dawn a ni.
Larsap chuan thalaite hmasawnna tura NCC hnathawh, ram leh hnam inpumkhatna lama thalaite kaihhruai kawngah hna pawimawh tak a thawk tih a sawi a. NCC-in kum 75 a tlin denchhena rally buatsaih a ni chu lawmawm a tih thu sawiin, ‘Inpumkhatna leh Thununna’ tih thupui hmanga hmarchhak state hmun hrang hranga zirtirna an kalpui tur pawh a hlawkthlak dawn hle tih a sawi bawk.
Mizoram thalaite chu NCC-ah a tel tha pawl leh thahnemngai taka thawktu zing ami nia a hriat thu a sawi a. Lungleiah 2 Mizoram Bn NCC a awm leh tak hnuah thalaite tan NCC-a tel theihna a inhawng zau sawt, tiin, NCC chuan thalaite chu mi puitling, khua leh tui thaah a chher thin a, sipaia luh tumte tan chauh lo pawh thalaite tana inhmanna hmun tha a ni tih a sawi.
November 6 – 26 thleng rally hi neih tur a ni a, hemi chhung hian km. 3500 a thui vel an zinkual hman tura chhut a ni. Hmarchhak state zawng zawng a paltlang dawn a, hnam zia leh nunphung inhriatsak tawn bakah inpumkhatna chungchang chu thupuiah hmangin program hrang hrang duan a ni a. G20 – ‘One Earth, One Family, One Future’ tih pawh inzirtir a ni ang.