NDA leh INDIA zawm lo tur BSP te ti

BSP chief Mayawati chuan ruling NDA leh oppostion INDIA bloc ah Lok Sabha inthlan lo awm turah an tel ve dawn loh thu a sawi chiang a, an party chuan an chakna hmangin inthlan an hmachhawn dawn tiin a sawi.
BSP UP unit tena thuchhuah an siamah, “BSP chief leh UP chief minister hlui ni bawk Mayawati chuan senior leader te nena Lok Sabha inthlan tura sawihona an neihah Uttar Pradesh leh Uttarakhand ah te seat tam zawk lak ngei tuma hmalak ni se an ti a ni” tiin a tarlang a.
“Sawihona neihah chiang takin Bahujan Samaj Party (BSP) te chuan mahni intichakin, ruling NDA leh opposition INDIA bloc te lak ata inlakhran ve ve ni se a ti a ni,” tiin thuchhuah chuan a tarlang.
Mayawati chuan party member te chu fake news laka fimkhur tura ngenin anti-BSP elements ten nasa takain propaganda leh political conspiracy an kalpui mek a ti bawk a. “Kawng engkimah fimkhur taka awmin kan inthlan inpuahchahna tihbuaiin a awm tur a ni lo,” tiin a sawi bawk a.
“Mipui tana tha leh mipui hlawkna leh hamthatna tur thilah chuan BJP leh Congress te hi an inang reng a, anti-poeple ve ve an ni,” tiin Mayawati chuan a sawi bawk a.
BSP chief chuan SC, ST leh OBC te tana reservation siam chu namnul a nih theih nana hmalakna kalpui mekin a awm a ti bawk a.
“Sorkar berin thleibik neia vantlang a kaihhruai chhung chuan mipui ten hlawkna leh chhawmdawlna tak tak an dawng thei dawn lo va, paper chauha awm mai tur a ni,” tiin a sawi bawk.