NDA tak tak kan neih loh vangin development hmu lo – BJP

Central malsawmna kan duh viau laiin, a luankawr kan hnawl thin a. NDA tak tak kan neih loh avangin Mizoramah development a thleng thei thin lo tih BJP chuan an sawi
BJP Mizoram State Hqrs chuan, Lok Sabha inthlanpui neih zawh taka ram hmasawnna dik duha BJP candidate Pu Vanlalhmuaka vote-tu chungah lawmthu an sawi tih a sawi a. Mizoramin Union minister neihna hun tha tak a nei a, mipuiin party politics kan atchilh bur lo a nih chuan BJP MP neih ngei an inring tih a sawi.
Inthlan dawn apiangin Congress party-in dawt politics tlangaupui thin mah se, Mizoram mipuiin thudik an hriat ve zel tawh avangin, an thusawi chu an mi leh sa mi tlemte chauhin an tuipui tawh a, tun atanga hun reilote ah Mizoramah pawh Congress party hi umbo an la ni thuai dawn tih a sawi a ni.
India ram pum thlirin BJP leh a thawhpuiten MP 543 atangin MP 400 chuang an target a, Mizoram MP pawh opposition lamah nge ruling lamah a thut dawn tih kan thlir mek a, central blessing kan duh ang chiahin, a luankawr kan hnawl thin avang leh NDA tak tak kan neih loh avangin kan beisei development a thleng thin lo tih a sawi bawk.
‘Politics-a kan awm chhan leh sawrkar din chhan chu development a ni a, chumi thlenna tur chuan BJP/NDA tak tak sawrkar kan neih a ngai. Mizoram hmalam hun thlir chunga kan ram leh hnam leh sakhua a himna tur leh Zohnahthlak tlang hrang hrang ami ten harsatna an tawh chang pawha thlamuang taka an awm theih a, inhumhimna tlaka siam turin, Zofate Jerusalem Mizoram hian mahnia thawhchhuah kan neih a, kan intodelhna tur ngaihtuah chunga politics khel turin mipui kan ngen a ni,’ BJP chuan a ti.