NE state-ah centre-in min zuam ber – Robert Romawia

NE state-ah centre-in min zuam ber
– Robert Romawia
India hmarchhak state zingah sawrkar laipuiin Mizoram chu min zuam ta ber niin MNF MLA Robert Romawia Royte chuan a sawi a. MNF a sawrkar leh thuai loh chuan ram leh hnam tan a him lo tih a sawi.
Thawhtannia Mizo Hnam Run inkhawmah MNF Thalai president ni bawk Robert Romawia Royte chuan sawrkar laipuiin Mizoram a zuam ta lutuk tih sawiin, “Hmarchhak state-ah Mizoram min zuam ber. A pawi takzet a ni. Hnam party kan sawrkar leh thuai loh chuan kan ram leh hnam tan a him dawn lo,” a ti. Nagaland CM pawh Delhi-ah kalin Free Movement Regime (FMR) a dodal thu huai takin a puang ngam tih a sawi.
“Kan chief minister thar chuan Delhi-a a zin tumin FMR hi sawrkar laipui thu a nih thu a zu thlen a. Assembly-ah ZPM MLA-in FMR dodalna a putluh chu zaah zain kan thlawp a nih kha. Amaherawhchu, 2024 December 30 khan Mizoram sawrkar chuan order tichhuakin Mizo mipui tan mai ni lo, hmarchhak tribal mipui tana thil tha lo tak FMR hlihna chu kalpui a ni ta a. MNF kha la sawrkar ila chuan hei hi kan tih loh tawp tur a ni ang,” a ti.
Local council leh village council inthlanah, Lungleia LMC inthlanah ZPM-in 100% a la a, a hnu MLA 2023 inthlanah pawh 100% bawk a nih laiin, tuna LMC huamchhunga LC inthlanah erawh 40% chauh an la a, 60% an hloh ta der tih sawiin, “Hetiang hi ruling party-te vote hmuh thin dan a ni lo,” MNF MLA hian a ti.
VC-ah pawh 47% chauh ZPM-in a la a, 52% ah an tlahniam tih sawiin, ruling party-in an hmuh thin ang an hmu phak lo nasa hle tih a sawi. “Ruling party chuan local body ah 70-80% vel an la thin tlangpui. Hei hian an dinhmun hniamzia a tilang chiang hle,” a ti.