NE state zingah Mizoramin ramngaw tha a nei tlem ber

Mizoramah rambua kan ngah em em a, ramngaw tha chu zaa -.74 chauh niin, hmarchhak state zingah a nei tlem ber kan ni tih chief minister Lalduhoma chuan a sawi. Serchhip khawpui kianga En Tlang ngaw, Nagar Van Yojana (Urban Forest) scheme cheng nuai 132 senga chei chu Thawhlehni khan chief minister hian a hawng a. India State of Forest Report (IFSR) 2021 tarlan danin, Mizoram pum zau zawng atanga zaa 84.53 chu ramngaw (green cover) in a la tuam a. Hei hian ramngaw nei tha state anga min lan tir laiin, ramngaw tha (very dense forest) erawh zaa 0.74 chauh kan nei tawh a. Hmarchhak state zingah ‘very dense forest’ nei tlem ber kan ni mek tih a sawi.
“Rambua (open forest) kan tih ang hi kan ngah em em ringawt a. Kan ram zau zawng atanga chhutin zaa 56.68 hi rambua a ni. Ramngaw tha (virgin forest /very dense forest) chu protected areas – National Park & Wildlife Sanctuary ah bak kan nei tawh lo tluk a ni,” a ti.
Serchhip khawtlangin sawrkar chet hma kum tam tak atangin ramngaw humhalh hna a lo thawk tawh chu chhuanawm a tih thu Serchhip bialtu MLA Lalduhoma hian a sawi a. Ramngaw nei tha ram leh khua apiang kan la awt dawn tiin, vawiina bul tantute chu mifing, hmathlir nei tha khua an ni dawn tih a sawi.
“Kum tinin lo leh huan hal la bansan thei chiah lo mah ila, hmasawnna hna thawk zel chungin, kan ram hmun tam tak hi tha taka humhalh kan tum dawn a. Environmental balance (zero emission) nei turin kal zel kan tum ang,” a ti.
He hmalakna hian midang tiharh se, kalpui mekte tiphur zual se, ram hmangaihna meichher hi Serchhip atangin nasa takin eng chhuak se a duh hle tiin chief minister hian a sawi bawk.
8 Nagar Van Yojana-a sawrkar laipuiin khaw chhunga ramngaw siam beihpui a thlakna a ni.
8 2020 June 5, World Environment Day khan a puang a, a thawhkhatnaah, kum 5 chhungin urban forest 200 siam an tum.
8 Urban forest siamna tur sum hi CAMPA (Compensatory Afforestation Fund Management and Planning Authority) CAF (Compensatory Afforestation Fund) atanga pek nise, Pune-a Warje Urban Forest chu role model-ah hmangin khawpui dangah hma lak ve nise, an ti.
8 Kum 40 chuang Serchhip YMA hian an lo enkawl tawh a, hectare 100 a zau, En Tlang Ngaw chhungah hian Nagar Van hmangin hectare 50 huam chinah thing engemawzat phun belh a ni.
8 Fur ruahtui luangral tur khawlna hmun 6 siam niin, check dam engemawzat siam niin, kea ramngaw fanna tur kawng, Interpretation Hall te pawh siam a ni.
8 Tlangchhipa dil awmsa chu cheibawlin a chungah lei dawh a nih bakah hmun dangah ‘hruizen lei’ dawh a ni. Fencing leh gate pui pawh tha taka siam niin building awmsa chei thar a ni.