Nehemia Challenge (Neh 1:6; 6:5-9)

Rev. V.L.Luaia Hranleh

Thuhmahruai
       Nikum (2023) December atang khan Social media hmanga Kohhran tihmualpho tuma beih rengna karah kan rawngbawlpuite chunga harsatna thlengte chuan rilru a tihrehawm hle maia. Thla 2 leh a chanve chhungin Pastor thawk lai 2 leh Pensioner 2 ngawtin chatuan ram min pan san hman der mai. Chu mai bakah kan  Pastor leh thawktu dang zingah natna khirh takin a tlakbuakte, mualphona rapthlak tak tawkte an han awm mek bawk a.
Chutiang boruak tha lo min delhtu rit tak a awm reng lai mekin  chanchinbu leh social media hmangin Synod office chu dawr har leh hrehawm ber niawm hialin zau taka vawrh mualpho kan ni zui lehnghal bawka. Kan thinlung hliam pem laiah te chuan rin loh lamah chingal fir rawn leihin a thip vawt vawt ngei mai. Fakna chauh dawng thin khan hetiang selna han dawnte hi kan lo mamawh hle a ni ngei ang. Thlarau nun than nan pawh damdawi thlum chauh nilo, a kha deuh tepawh kan mamawh ve thozia a lo lang e.
1. Fakna leh selna
A hmuna ka luhchilh ve hma atangin Synod Office hian mite fak an hlawh hle thin a. Ka luh ve chinah pawh hian chu fak thinna chu dik hle in ka hre bawk a. Tuktin hna tan hmain Pathian hnena inhlanna hun (devotion) nei ziahin midang tana malsawmna ni tura infuih thin kan ni a. Chuti chung chuan mualpho taka selna kan han tawng ta hlauh mai si a. Mahni nihna inhmuh hi a lo har ngawt mai. tha emaw kan lo intih laia kan side B lam tha bik lo lai lo lang ta chu infuih thar nan kan hmang ve mawlh mawlh bawk a. Rawngbawltu nun atana pawimawh, Fakna hi kan tan thlemtu, sawichhiatna erawh kan thian …tih chu a takin kan tawng mek a ni.
 2 Nehemia challenge
Kan thinlung hliam pem lai taka chingal fir rawn leih chu ngaih mai aiin a thipa, a fan ril raih mai. Hetianga dawr har awm mi hi ka thawhpuite zingah tumah ka hmuh loh avangin awih har ka ti hle a.
Jerusalem kulh chim a siam that chhoh laia dodal thintu Sanbalata, Tobia leh Gesema-te bawkin dawta an phiar vak tum khan Nehemia chuan Sanbalata hnenah, “I sawi ang reng rengin engmah tih a awm lo, i phuah chawp mai a ni” (Neh 6:5-9)a tih anga han tih ve mai tak hi ka nap a. Mahse maw, miin an hmuh si chuan dawt a nih ka ring bik lo. Ka hriat phak loh hian dawrtu lungawina khawp thlenpui zo lo hetianga sawi tur ting kan lo awm palh a nih si chuan thiam thu sawi tur reng kan nei mawlh lo.
Jerusalem khawpui kulhte chu a chhiat thu leh a chhunga chengte dinhmun chhiat zia khual thuthang a lo hriat khan Nehemia chuan a tel ve miah lohnaah pawh mawh a inphurh tir a. “ Kei leh ka pa chhungte chu kan lo sual ta si a !” (Neh 1:6) tia Pathian hnena ngaihdam a dil ang khan he thilah hian a mawh ka phura, mi hmai eng pawh hmu ngam mang lo khawpa zak hrehawm ti tak chungin Lalpa hmaah ngaihdam dilin ka kun ve reng ringawt mai a ni. Tirhkoh Paula’n eng dinhmun pawha awm dan thuruk a hriatte kha hetianga selna leh rel pharna tawh lai te hi a hman (apply) hun tak chu a ni si a! (Phil 4:11&12). |hal laia to haw, thlipui nena rawn thawk thut ang mai hian ka inring hman lo a ni ber e.
 3. A tak chu khawiahnge? : Hman deuh tawha Synod Office Building pawn lama Synod Office tih intar ‘F’ hawrawp pakhat tlak palh laia “ SYNOD OF ICE” tia chhiar mai theih chu keimahni thawktu ho ngeiin siam that vat a tul thu in hrilh nan leh fiamthu nana a thlalak kan inthawn kual vel chu siam that a ni daih tawh a. Chu thlalak hlui chu tuna khaw vawh lai denchen hian a rawn  darh thar leha. A thawktute dawr har meng vawt thip tih vel nen sawi zawma Direct hit tak maia min rawn kaptu hming ropui tak putu hi tunge a nih lah kan hre si lo. Zirlaite research a sawi lah chu eng hun laia mi nge, tute tih nge tih pawh a sawi University-a Social Research lam ti thintu ber hote pawhin an hre bawk si lo.
A tak hmuh tur awm ngat se chu fakna dawng reng thinte in enfiahna tur darthlalang min rawn hun saktu hi ngaihdam dil paha lawmthu sawina chibai buk tak ka nap a. Chumi rual chuan kohhran rorelna kalphung a hriat fuh tawk loh laite erawh han hrilhfiah atan a tha hle mai bawk. Kan chanchin hriaa ral khata min lo dem zui mai thinte u, khawngaih takin lo leng ula, heng selna zawng zawngte hi a tak chu khawiahnge tih hmuh tumin min rawn len chil mawlh teh u.
4. Sanbalatism: Office lam chu lo dah tha rih ta ila. Jerusalem kulh siam thatu Nehemia tih that dodala, dawt leh thudik chanve hmanga phiar ru ngar ngartu Sanbalata leh a thiante ang kha tunlai Zoram khawvelah hian an pung ta hle.  Kohhran sawisel satliah pawh ni lo, mipuite thinlunga Kohhran ngaihnep leh huatna tuh tum hi an pung zel a. Kohhran tichhe tura Pastor, Missionary leh Upate inkara hem thlak an thiam hle bawk. Hetiang ti tura a hranpaa ruaitu an awm em ni ang aw tih tur khawpa hna bera neih an awm tan mek bawk.
Kohhran chuan a seltute lakah thiam thu insawifiah ve tum lovin a sepui ruah  tuar ngawt zela. Hunin a dikna a tar lang leh nge nge thin. Thil dik lo titu chunga action la theitu Committee leh Inkhawmpuite  chu an hunbi  nghah vang vang phawt a ngaih thin dan hre phak loten Kohhran chu sual hum leh thup tum, Corruption pawh pawm zam ber anga an selna lehzel lo awih mai zel hi chu i sim ang u. A dik leh a tak hriat hmasak tum ila, siamthat ngai chu infuih zel ang u.
Tlangkawmna
Lei kohhran hian sel bo khawpa famkim ni reng a nei dawn lo. Misual bawlhhlawh hnu, khawngaihnaa chhandam ve mai chauh te hi that bik vanga rawngbawl lah kan awm hek lo.  Chutih laia siamthat tum si lova thudik chanve leh zeldin thu bawl hmanga Lalpa Kohhran chhiatna lai tlangau puia, thil hluite pawh a thar ang maia bawl phuan leh vak chin hi kan Pathian lawm zawng a ni bik hauh lovang. Rawngbawltute hian kan lakah kohhran mipui thikthu a chhe bik tih hriain  fimkhur lehzuala tan lak a tul a. Mi selna chu insiamthatna tura damdawiah hmang thiam ila. Dodal leh selna pung zel karah Lalpa Kohhrante hi Thlarau Thianghlima siamthatna lamtluang zawh zel thei tura rorel thiamna an neih theih nan kan hruaitute tawngtaipui hi kan tihmakmawh a ni bawk.
Lalpan malsawm che rawh se.
Tukchhuah nuam le