Nehru hming lam loh helh hle

Zalenna chu constitution leh democractic value-a invialchiat inhumhimna phaw a ni tiin Lok Sabha-a Leader of Opposition Rahul Gandhi chuan Independence Day-a ram pum huapa thuchah a sawiah a tarlang.
“Ram mipuite Independence Day chibai ka buk che u a. Kan tan chuan, zalenna hi thumal a ni ngawt lo, kan inhumna phaw lian ber, constitution leh democratic values a invialchiat a ni” tiin Congress leader chuan X ah a sawi a. “Duh sawi theihna thiltihtheihna, thudik sawi theihna leh kan duh te tihhlawhtlin beiseina a ni” tiin a sawi bawk.
Congress president Mallikarjun Kharge pawhin democracy leh constitution chu kan phaw lian ber a ti bawk a. “Kan thawk tawp thlengin kan humhim tlat ang. Opposition hi democracy ah chuan oxygen a ni a. Sorkar in constitution kalh rilru a neih te enfiahtu leh mipuite aw tiliantu a ni a. Sorkar berin constitutional leh autonomous institution te a duh dan dana a sawisa ta mai hi a hlauhthawnawm a ni” tiin a sawi bawk.
Congress chief chuan party worker te chuan ram humhim nan mahni inphatralraih an inpeih tiin a sawi bawk a. “Hei hi min thlahtute kan zahderna lantirna tur ber pawh a ni” tiin a sawi bawk.
Kharge chuan AICC headquarter-ah national flag pawhpharhna neiin UPA president hlui Sonia Gandhi leh Rahul Gandhi te pawhin an telpui a ni.
Congress general secretary Priyanka Gandhi Vadra pawhin zalenna, democracy, justice, equality leh national unity chu kan ram tana kan intiamna a ni, a ti a. “Heng values te hi kan Constitution foundation a ni a. Humhim chu ram tana kan mawhphurhna pawimawh ber a ni. Kan zalenna, Constituion leh values te humhim kan tumnaah kan chiang a ni” tiin a sawi bawk.
Hetih lai hian Congress te chuan President Droupadi Murmu in All India Radio kaltlanga thuchah a sawiah independence movemnet a mi langsar tak tak a sawilan zingah India Prime Minister hmasa ber Jawaharlal Nehru a sawi lang lo chu sawiselin BJP tena history atanga Nehru nawhreh tuma an hmalakna kalzel tiin an sawi.
Congress general secretary (in-charge, communications) Jairam Ramesh chuan August 14, 1947 khan Jawaharlal Nehru chuan a thusawi chuai thei tawh lo tur ‘tryst with destiny’ chu Central Hall ah a sawi a ni, a ti a.
“August 15, 1947 a All India Radio kaltlanga a thusawiah khan Nehru khan ‘India mipuite chihahhlawh hmasa ber’” a ni tiin a insawi a. A tukah a thusawi chu chanchinbuah te chhuah uai uai a ni” tiin Ramesh chuan a sawi a.
President Murmu thusawiah Independence movement a mi langsar tak tak te sawi lan an nih rualin India PM hmasa ber British jail-a kum 10 tang Nehru hming sawilan a ni lo a ti a.
“History atanga a hming nuaibo tuma campaign chhunzawm zel a la ni,” tiin Ramesh chuan a sawi bawk.