Rev Dr Ramengliana
-- Advertisement --
Nikum lawka Mizoram sorkar thar piang kha sorkar thar mai ni lovin party thar sorkar a ni nghal bawk a. Mi tinin hun thar inher chhuak angin kan ngai a, kan beisei pawh a sang hlawm hle a ni. Tin, an thil min tawktarh pawh a sang bawk a. Ramin hun thar a luh ngei theih nan kan puihna – thiltih leh tawngtai – tel lo chuan min tihnual leh beidawngtuah an tang mai ang tih hlauhawm a ni. Chutih lai chuan social media-ah na tak taka Kohhran selna a ri chamchi a. Thil nihphung hriat chian loh vangte leh kalphung hriat tawk loh vangte ni thin mah se miin an sawi tawh chuan lo pawmpui mai thei an kat nuk bawk a. Kohhran an sel hian nemngheh rawngbawlna neitu Pastor leh Upate an kawk deuh thin niin a lang a. Tun tumah hian chutiang ni ve lote mawhphurhna pawimawhzia lam i han hrut hlak teh ang.
Nemngheh lohte hi Pathianin a phut na hle
Kohhrana nemngheh rawngbawlna chanvo chelh ve lote hi ‘laymen’ an ti a. Hemi tawngkam Zotawngin kan nei chiah lo a ni mai thei. Tunlai khawvelah hian kohhran rawngbawlna-ah laymen-te hi an indah awl ta viau a ni mai thei. Kohhran thil leh rawngbawlnate hi an ko-a innghat ve lo angah an lo ngai deuh thin pawh a ni mahna. Mahse Bible kan enin chutiang chu a ni hauh si lo va. Abrahama, Josepha, Mosia, Davida, Daniela, Nehemia, Estheri, etc., te nun kan en hian Bible pawhin a chhuan ber berte hi layman, sakhaw puithiam hna thawk ve lem lote an ni a. Ram hruaina hna pawimawh tak chu an kutah Pathianin a dah a, Pathian tih tak chunga an kenkawh a phut tlat a ni. Tin, an tih theih a tam hle bawk a. Pathianin ama duhzawng hlen turin a phut na hle a ni.
Thuthlung Thlung thar rawngbawlna pawh han en ila. Thuthlung Hlui lam nen a zia dang hret mah se rawngbawlna-ah ‘puithiam/puithiam lo’, ‘pastor/-tor lo’, ‘Upa/-pa lo’ a awm lem lo niin a lang. Innemngheh hranpa em em pawh a awm lo a niang. Pathian kohna leh mawhphurhna bikte chu a hrang mai thin chauh a ni a. Ringtu zawng zawng chu mahni hmazawna phu suau suau tura ngaih mai an ni a. Thuthlung Hluiah kha chuan anmahni ram bila Pathian Ram thlen tura tih an ni nasa a. Ram leh hnam zawnga kan thluk chuan Thuthlung Hlui atanga kan tam a pawimawh ang. Thuthlung Tharah erawh chuan Pathian Ram Chanchin Tha khawvel puma hril darh lam kha an uar ta a, thil inkalh erawh a ni lem lo vang. Eng pawh ni se, ‘I ram lo thleng rawh se,’ tia tawngtai mekte tan hian Pastor leh Missionary ‘fulltime worker’ te ai mah mahin ‘Lay’ nih hian kan tih theih a tam awm asin. Han ngaihtuah chik mah teh aw.
Nemnghehte tih theih a tawngchham
Rawngbawlnaah hian hun puma thawk Pastor/Missionary te hi kan dah sang hle. A lawmawm em em lai hian tih fuh loh kan nei thei tlat tih hria ila. An rawngbawl dan tur duhtui hle si a, keimahni ‘kel e awl’ mai kan tum chuan kan ti dik lo chhiava dawn a ni. Hetiang rilru pu chunga mahni inthiamna eng emaw chen kan nei thin a nih phei chuan a pawi ngawt ang. Kan rama Pathian Ram a lo thlen tak tak theih nana mawhphurhna hi Krista thisenin a tlan theuh theuh zingah mawhphurhna sang zual an awm chuang lo. Kan hmazawn theuha kan tih tur fel taka tih hi thil pawimawh leh hlu ber chu a ni zawk. Pastor hnaa tel lo tam tak MLA chuan a ti thei a, Missionary hnaa tel lo tam tak Officer chuan a ti thei a, Revival Speaker tih theih loh tam tak hi Zirtirtu-in a ti thei a ni. Football coach chuan khelh dan tur game plan leh football skills te chu zirtir tha viau mah se, field laia kheltute chu player te bawk an ni tho tho thin a nih hi.
Kristian rawngbawlnaah hian Catholic/Orthodox leh Protestant-te thluk dan a dang hret niin an sawi. Catholic/Protestant te hi chuan Puithiam rawngbawlna, hun puma Kohhran tana inserhte rawngbawlna hi Kohhran member pangngai ‘laymen’ ho rawngbawlna aia sangah an ngai a. Thlarau lamah pawh dinhmun sang bik leh serh hran bik niin an sawi thin. Chu chu Kohhran Siamthatna (Reformation)-in a thiah pakhat chu a ni. Sakhaw thila rawngbawlna bik hun puma puithiamna hna thawk tura nemngheh rawngbawlna hi Protestant kohhrante chuan sang bik leh ropui bikin kan inzirtir ngai lo va. Pathian Ram rawngbawlnaa mawhphurhna pakhatah kan ngai mai chauh a ni. Chu chu miin kohna a dawn ang zelin rinawm takin a thawk mai tur a ni bawk. Chumi awmzia chu Pastor hna chu hna bik a ni a. Pathian Thu zirtir te, sakhaw serh leh sang khawih leh Kohhran kilkawi a ni a. Kohhran Upaten chumiah chuan an thawhpui bawk thin. Chu chu a ni deuh mai. Pathian duhzawng ti tur leh a ram din tur hian Member zawng zawngte hian mawhphurhna hlutna inchen thapin kan koah nghah a ni theuh mai. Pathian thiltum leh duhzawng hi Pastor/Missionary/Upate rawngbawlnaah hian a kim lo va, an hna hian a daih bawk lo a ni.
Chungleng leh hnuaileng indo atang zirlai
Mizo thawnthu ‘Chungleng leh hnuaileng’ indoah khan an han tang tak tak chu ‘mahni tum tawk tawk vanzemah’ tiin chengkawl te hian pit ngal delh tliah an tum a, vate te pawhin changpat aduang tal man talh an tum bawk a, a lianin a lian, a tein a te, an tum tawk theuh chu thahnemngai takin an bei tih min hrilh thin. Ram leh hnam hmasawnna a zuan dawn chuan he ‘principle’ hi kan hman a ngai ngei ang a, kan Zoramah hian ‘Pathian Ram’ thleng tak tak tur chuan loh theih loh a ni bawk. Pathian hian Pastorte leh Missionary te rawngbawlna chauh hi a uluk lo va, amah ringtu zawng zawngte thiltih leh nunphung atanga a ropuina puan chhuah a tum a ni si a. Ngaih pawimawh loh bik tumah a nei lo va, ngaihthah bik hmun a nei hauh lo a ni.
A nihna takah chuan ‘laymen’ te kaltlang zawk hian khawvelin Krista hlutna chu an lo hre zawk thin a lo ni a. Kohhran member pangngaite chuan an hnathawhna hmunah, an thenawm khawvengah, an dawrkaina hmunah, an office-ah, an classroomah, an infiamna hmunah Chanchin Tha chu an keng lut a. Chumi hmunah chuan Krista Chanchin |ha chuan awmzia a nei tak tak em tih a lang thin a ni. Chung hmunte chu pastorte thlen phak lohna ram, missionary-te va pawh loh ruam a ni mah mah zawk a ni. Vawiinah chutiang hmuna Pathian tana ding ngam kan mamawh a ni tih kan hria. He khawvelah hi chuan Pathian aia thil dang thlang zawk an awm zel ang; mahse Zoram anga Kristian tamna ramah hian a ti tak tak ho hian kan mawhphurhna kan hlen that phawt chuan sawhkhawk duhawm a nei dawn tih a chiang a ni.