Nepal-a fur ruah kaihhnawiha chhiatnaah mi 93 thi tawh

Nepal-a fur ruah kaihhnawiha chhiatnaah mi 93 thi tawh
Thla thum liam ta chhungin khualrel chhiatna avangin Nepal-ah mi 93 an thi tawh tih Ningani khan sorkarin a puang a, heng zinga a tam ber hi ruah sur nasa kaihhnawiha chhiatna thlenga thi an ni.
Thi zinga 26 hi ram chhung hmun hrang hranga tekin a den hlum an ni a, tui lian vangin mi 14 an thi a, thlipui thawkin chhiatna a thlenah mi pariat leh lei min vangin mi pariat an thi tih an rama National Disaster Risk Reduction & Management Authority (NDRRMA) chuan a chhinchhiah.
Tun thla tira an khawpui, Kathmandu khawchhak lama tui lianin a lang mi 22 chu tun thlengin hmuh an la ni lo tih NDRRMA chuan a sawi bawk.
Hetih lai hian Department of Hydrology & Meteorology chuan kumin fur hun kal mekah hian kum liam ta kum 30 chhunga an dawn thin chawhrual aia tam an dawng tawh niin an chhinchhiah bawk.
June thla khan Kathmandu phaizawlah ruah mm 320.4 a sur a, kum 30 liam ta chhung khan June thlaa ruah sur zat chawhrual chu mm 242 a ni a. July 1 leh 16 inkarah an khawpuiah hian ruah mm 161 a sur leh tawh a, July thla puma ruah sur thin zat chawhrual chu mm 383.5 a ni thung.
July 1 khan NDRRMA chuan May 28 atanga fur ruah a sur tan atangin ruah sur nasa kaihhnawihah chhiatna hrang hrangah mi 31 thi awm tawhin mi 151-in hliam an tuar tih a lo puang tawh.
Hemi hnu hian Bhotekoshi lui lianin mi 20 chuang a lak bakah China nena an inkalpawhna, Kathmandu atanga hmarchhak km 120 vela hla, Rasuwa district-a Miteri Bridge lei a la bawk a. He thil thlengah hian hriat theih chinah mi pakua an thi tawh a ni.
Bhotekoshi lui lian avang hian hydropower project 10 vel chhia awmin district pathumah sabereka khuangkaih a thlen a, China-a vur tui nasain tui tilian bawkin Nepal-China inrina bula Rasuwa district-ah tui a len phah nasa hle a ni.