Nepal-in Everest lawn man tisang
Nepal-in Everest lawn man tisang
Kum 10 dawn hnuah Mount Everest lawn man chu tihpun a ni dawn a, Nepal chuan a tihpunna tur sang tak hi a a puang.
September atang hian khawvela tlang sang ber lawn tumte tan lawn hun laiin $15,000 (£12,180) sen a ngai tawh dawn a, a hma khan $11,000 niin 36% zetin a sang dawn a ni tih Nilaini khan puan a ni.
A lawn hun lai dang, April leh May vela lawn man pawh hetiang zat bi bawk hian a pung dawn a. September leh November inkara lawn tan $7,500 leh December leh January-a lawn duh tan $3,750 sen a ngai dawn a ni.
Mount Everest lawn phalna dilna hi Nepal ram sum hnar lian ber niin an ram economy-a tlang lawn leh trekking-na man hian 4% chuang a tum phak.
Tlang lawn lama mi thiamte chuan Nepal sorkarin Everest lawn phalsak a ngah lutuk chu an sawisel a, kum khatah permit 300 chuang pek thin a ni.
Nikum atanga sawihona lo awm tawh anga a lawn phalna man hi a pung a nih chuan lawn tum pawh an tlem hret rin a ni.
“Royalty (permit fee) hi hun rei tak ennawn loh a ni tawh,” tiin Department of Tourism Director General Narayan Prasad Regmi chuan Reuters a hrilh a. “Tunah hian kan han ennawn ve ta a ni,” a ti.
Regmi hian engzat chiah nge sum an hmuh belh theih dawn tih erawh a sawi lo.
April, 2024 khan Nepal-a Supreme Court chuan an sorkar hnenah Everest leh tlang sang dang an neiha lawn phalna an pek chhuah zat chu a bi tuk turin a lo ti tawh a, ‘tlangin a dawl zawh tawk’ ngaihtuah turin a ti.
He thupek avang hian a lawn thei zat bi erawh tuk a la nih riat a ni lo.
Everest-a lawn an tam lutuk leh hmun him lo taka a lawnte an intlar put laiin Nepalese sipaite chuan kum 2019 atang khan kum tin tlang then fai hnai an thawk tan a. Tlang hi khawvela bawlhhlawh paihna hmun lian ber tia sawi thin a ni.
Vawi nga an then fai tawhah bawlhhlawh tonne 119 leh ruang 14 bakah ruhrote pawh an chhar niin sipai chuan an sawi a. Tlangah hian ruang hi 200 vel a la awm niin an hre bawk.
Nepal hi khawvela tlang sang ber ber 14 zinga pariat awmna niin heng zingah hian Everest pawh a tel.