Nepal khawpui Kathmandu atanga thlawhna thlawk chhuak chu a thlawh chhuah hnu rei lo teah a tlakzui avangin mi 18 an thi. Thlawhna chesualah hian pilot chauh dam chhuakin damdawi inah enkawl mek a ni.
Saurya Airlines test flight-ah hian mi sawm pakua chuangin an zingah technical staff leh crew member pahnih an tel bawk.
Nepal aviation industry hian safety record a nei chhe hle a, khawchin sawi lawk harsa takin a tuam a nih bakah regulation lamah a mumal tawk lo hle tia sawisel tawh thin a ni.
Nepal Civil Aviation Authority’s search and rescue coordination centre chuan thlawhna chu Tribhuvan International Airport atanga a thlawh chhuah hnu minute tlemte ah a tla nghal tiin a tarlang a.
Saurya Airlines hi tourist te funkhawmna thin Pokhara pan a ni a. Airport chief Jagannath Niraula chuan lei atanga a thlawh kan hnu lawk minute khat pawh tling lovah a tla zui nghal tiin a sawi a, eng vanga tla mai nge a nih chu chian theih a la ni lo.
Head of Tribhuvan International Airport chuan a lan danah mai chuan thlawhna chuan a kawng lo tur a zawh tiin a sawi a. “A thlawhchhuah veleh veilama inher tur kha dinglamah a inher zawk tlat a ni” tiin airport chief Jagannath Niruala chuan a sawi.
Nunna chan zinga a tam ber chu Nepali vek niin pakhat Yemeni khua leh tui engineer chu nunna chan zingah a tel bawk a. Airport official te chuan thlawhna atangin thawm ri bengchheng tak an hriat thu an sawi bawk.
Nepal hian air safety record a nei chau hle a. January 2023 pawh khan Yeti Airlines crash avangin mi 72 in nunna an chanphah tawh a, a hnuah thlawhna tlakchhan chu pilot in tihpoalha power line a cut vang tih a ni.
1992 khan Pakistan International Airlines mi 167 phur chu Kathmandu Airport a tum dawnin a chesual tawh bawk. 2019 khan Bangladeshi airliner chu Tribhuvan airport bul lawkah tla tawh bawkin mi 51 in nunna an chan a, mi 20 an damchhuak thung a. Investigation neihnaah thlawhna chuan runway zawh fuh lovin pilot-in tum luih a tum avangin a chesual tia sawi a ni.
Kum 2015 khan Turkish Airlines jet pawh chhum chhah tak karah airport runway nal tak pela tlanin a chesual a, mahse a chhunga chuang mi 238 zingah hliamna tuar an awm lo hlauh thung.
Kathmandu airport hi tlangin a hual phaizawla awm niin pilot te tan tum harsa tak tia sawi a ni bawk.
Saurya Airlines te hian Nepal-ah destination pangaah an thlawhante an thlawh tir a, thlawhna pathum Bombardier CRJ-200 jets an nei a ni.
Nepal thlawhna chesualah mi 18 an thi
Get real time updates directly on you device, subscribe now.
Prev Post
Next Post