Nepali mipuiten Oli thlak turin chief justice hlui Karki-i an duh ber

Nepali mipuiten Oli thlak turin chief justice hlui Karki-i an duh ber
Nepal-a mipui lungawi lohna nasa tak lantir a nih hnua prime minister bâng ta thlak turin lungawi lohna lantirtute chuan chief justice hlui, Sushila Karki-i chu an duh ber nia sawi a ni.
Mipui aiawhte hi Nilaini khan Kathmandu-a army headquarters-ah sipai hotute nen sorkar inthlak turah an indawr a, justice hriat hlawh tak hi an duh niin an sawi.
Prime Minister Khadga Prasad Oli-a chu Thawhlehni zana a bân hnuah President Ram Chandra Poudel-a chuan mi thar an awm hma a nihna lo chelh turin ti mah se a chenna a chhuahsan nghal a, a awmna chin hriat a la ni lo.
Mipui aiawha sipaite nena inbiaknaa tel, Rehan Raj Dangal-a chuan Karki-i chu sorkar lailawk hruaitu atan an rawt tih a sawi a. Ani hi an rama hmeichhe zinga Supreme Court-a chief justice ni thei awm chhun niin kum 2016-2017 chhung khan a ni a, an rama hriat hlawh tak a ni.
Nepal-ah hian ni hnih chhung mipuiin lungawi lohna nasa taka an lantir hnuah Nilaini khan sipaite chu Kathmandu khawpuiah an patrol a, buaina a awm tawh rih lo va, Himalaya tlangdung ram hi kum tam tak chhunga mipuiin buaina an siamna lian ber an tawn chu a reh rih mek.
Mipui thinrim hian Thawhlehni khan thil halin tharum thawhna pawh a thleng nasa a. A hma zanah prime minister a bâng a, politician-te chenna in eng emaw zat, sorkar building leh parliament suasama hal a ni a. Ni hnih chhungin mi 25 thiin mi 633-in hliam an tuar niin Nilaini khan health ministry-in a sawi.
Lungawi lohna lantirnaa a hmahruaitu ber, ‘Gen Z’ tia an sawi pawlte chuan thil tihchhiatah hian an inhnamhnawih lo nia sawiin remchanga hmang tute emaw tih a nih thu an sawi.
Nilaini khan Kathmandu-a thlawhna tumhmun chu hawn leh tawh niin khawpui hi a la reh hle a, mipuiin curfew puan zawmin an tawm a; mahse, in kang khu erawh a la zam nasa.
Ningani zing thleng ram pumah curfew puan a la ni a, sipaite chuan thil suasam leh tharum thawh chu an hrem dawn tih an sawi a. Tharum thawh leh mi rawk vangin mi 32 man tawhin silai 31 an man tawh bawk.
Officer-ten khawpui chhunga military checkpoint an siamah ID an endik a, mipuite chu ina awm turin an ti a. ‘Tul lova zin chhuah’ tum lo turin au rinna hmangin an au bawk.
Hetih lai hian thalai tlem azawng chu hmai tuama chhuak an awm a, bawlhhlawh bawm kengin buaina avanga hnawk an thian.
Nepali tam takin hetianga mipuiin an nawrna avanga inrelbawlnaa thil danglam a awm tur hi tha an tih rualin heti taka tharum thawhna leh thil tichhiaa chetna a thleng erawh mak an tih thu an sawi hlawm.
Mi thenkhat chuan mipuite hi tute emaw fuihtu an awm niin an ring a, sipaite erawh chuan a nih a rinawm loh tih an sawi thung.
Lungawi lohna lantirtuten Nilainia thuchhuah an siamah chuan an thil kalpui mek chu tharum thawh lo zawng, vantlang muanna tichhe lo zawng an duh tih an tar lang a. Vantlang him nan leh mipui thil a him nan mawhphurhna pawh an lak thu an sawi a. Sipai leh police chu a tul anga curfew kengkawh turin an ngen zawk.
Heti taka Nepal-a mipui thinrimna hi kar hmasaa sorkarin WhatsApp, Instagram leh Facebook tela social media platform 26 a khap an duh lohna atanga intan a ni a, a hnuah an rama politics-a ei rukna nasa lutuk nia sawi duh lohnain a zui ta a ni.
Social media khap a nih hma hian ‘nepo kid’ campaign an tih, politician fate khawsak sang lutuk, an nu leh pa an ei ru nia ngaihna lian tak a lo awm a, social media-ah nasa taka thehdarh a ni nghe nghe.
Thawhtanni zanah social media khapna hi hlih leh nghal ni mah se mipui thinrim a kal laklawh am Thawhtannia an buainaah police nen innawrin mi 19 an thi a ni.
A hma nia thihna thleng hian Thawhlehniah thinrimna nasa tak siamin buaina a chhuak zui a, mi pathum dang an thi leh a, police pahnih an thi bawk niin thuneituten an sawi.
Lungawi lohna nasa zelin Kathmandu-ah chuan rorel laia tel, Nepali Congress Party hmunpui tihchhiat a ni a, an hruaitu, prime minister hlui, Sher Bahadur Deuba in an suasam bawk.
Mi za rualin parliament building luhchilhin an hal a, a tukverh tikehin a bangah ei rukna duh lohna thu leh mi lem tam tak an ziak rang bawk.
Sorkar pisa tam tak awmna, Singha Durbar pawh luhchilh a ni a, Nilaini khan Supreme Court chuan an hung chhungah thil chhia a tam em avangin thubuai an ngaihtuah tur pawh an sawn hla vek tih an puang.
Hliam tuar zingah prime minister hlui, Jhalanath Khanal-a nupui pawhtelin Thawhlehnia Kathmandu-a an in an halnaah a kang hliam a. Chanchinbu thenkhatin Ravilaxmi Chitrakar-i hi a thi nia an tar lan hial hnuah a pasal chuan Kirtipur Burns Hospital- intensive care-ah enkawl a ni tih a sawi.
Thawhlehnia buaina chhuah lai khan ram chhung hmun hrang hranga lung in tang sang chuang an tlan chhuak bawk tih tual chhung thuneituten an sawi.
Thawhlehni tlai khan khawthlang lam, Banke-a kumtlinglote dah khawmna atanga tlan chhuak mi panga chu kah hlum an ni a. Lung in director chuan kum 18 hnuai vek an ni tih a sawi.